Əsas Səhifə > Güney Press, Manşet, Araşdırma > “İndi bilirəm ki, bu çirkli pulun “yuyulması” imiş”
“İndi bilirəm ki, bu çirkli pulun “yuyulması” imiş”10-06-2017, 14:57 |
![]() Bakı Hərbi Məhkəməsində ləğv edilmiş Milli Təhlükəsizlik Nazirliyinin əməkdaşı, polkovnik Mirəziz Əsgərovun cinayət işi üzrə növbəti məhkəmə prosesi keçirilib. Hafta.az-ın əməkdaşının verdiyi xəbərə görə, proses hakim Elbəy Allahverdiyevin sədrliyi ilə aparılıb. Məhkəmə ictimaiyyətə açıq şəkildə keçirilib. İlk olaraq ittiham aktından qısa arayışı diqqətinizə çatdıraq: “Əziz Vidadi Əsgər oğlu Zaminbankdan 975 min manatdan 675 min manatını hesabından çəkərkən həbs edilib. Zorla onun qoluna qandal vurulub. 24 aprel 2012-ci ildə Mirəziz Əsgərov Vidadi Əzizdən 100 min manat pul tələb edib. Zorla, silah tətbiq edərək və vəzifə səlahiyyətlərini aşaraq ondan rüşvət alıb”. Keçmiş MTN polkovniki isə ona qarşı irəli sürülən Cinayət Məcəlləsinin 182, 341 və 311-ci maddələri üzrə ittihamlarda özünü təqsirli bilmədiyini qeyd edib. Mirəziz Əsgərov ləğv edilmiş hüquq-mühafizə orqanında ona verilmiş tapşırıq əsasında xarici kəşfiyyat orqanları ilə əlaqədə şübhəli bilinən Vidadi Əzizi izlədiyini vurğulayıb. Sayca yeddinci olan məhkəmədə şahid qismində "Zaminbankı"n keçmiş müdiri Qubad Qubadov şahid qismində ifadə verib. Bank müdirinin sözlərinə görə o aprelin 7-də şənbə günü olmasına baxmayaraq, xaricdən həvalə yolu ilə göndərilmiş 900 min ABŞ dollarını qəbul edib. Pulu isə tanımadığı adam gətirib. Əlbəəl ona təqdim edilib. Pulları da şəxsən özü sayaraq Vidadi Əzizə verdiyini vurğulayıb.Həmin məbləğin 600 min dollarını Vidadi Əzizə verib. Zərəçəkən Vidadi Əziz həmin məbləği götürüb gedib. Qubad Qubadov onu da qeyd edib ki, bundan bir qədər sonra ləğv edilmiş Milli Təhlükəsizlik Nazirliyindən tanımadığı şəxs ona zəng edib. Qalıq məbləği o, MTN əməkdaşlarına təhvil verdiyini deyib. Sonra ittiham olunan şəxsin vəkilləri və prokuror Qubad Qubadova əlavə suallar ünvalayıb. Prokuror: -Necə olur ki, siz bank müdiri kimi pulu rəsmi yox, qeyri-rəsmi qəbul edirsiniz? Qubad Qubadov: -Nəriman bizim müştərimiz olub. Elə bilmişəm ki, həmin 900 min dollar Nərimanın puludur. Prokuror: -Axı şənbə günü banklar işləmir? Necə olur ki, siz o pulu qəbul edirsiniz? -…Günortaya kimi işləyirdik o vaxtlar… Sonra ittiham olunan MTN polkovniki Mirəziz Əsgərovun vəkili Fazil Nəhmətov keçmiş bank müdirinə bir neçə sual verib. Vəkil bank müdirindən bu qədər məbləği mədaxil etməklə vətəndaşa hansı bank xidməti göstərdiyini soruşub. Həmin xidmətə görə bankın hesabına hər hansı məbləğin keçib-keçməməsini soruşub. Qubad Qubadov da hesaba belə bir məbləğin köçürülmədiyi cavabını verib. Sadəcə olaraq Vidadi Əzizə və yaxud Nəriman adlı sahibkara qeyri-rəsmi yardım göstərdiyini bildirib. Fazil Nəhmətovun növbəti sualı daha diqqətçəkən olub. İttiham olunan şəxsin vəkili bank müdirindən soruşub ki, o vaxt bilməsə də indi Qubad Qubadov anlayırmı ki, bu qədər məbləğ çirkli pulun “yuyulması” məsələsidir. F.Nəhmətov sualına aydınlaşdırıcı əlavə edib ki, yəni 900 min dollar Azərbaycana həvalə yolu ilə ötürülüb. Qubad Qubadov isə cavabında bunun sonradan fərqində olduğunu məhkəmə önündə izah edib. Daimi müştərisi olduğu üçün həmin məbləği qəbul etdiyini vurğulayıb. Ardınca zərəçəkən qismində təmsil olunan Vidadi Əziz ayağa durub və şahidə çox suallar verilməsinə etiraz edib. Prosesi aparan hakim isə Vidadi Əzizə bildirib ki, şahidə bütün aydınlaşmamış məsələlər haqqında vəkillər və dövlət ittihamçısı sual verə bilər. Sonra Vidadi Əzizdən 41 min manat rüşvət almaqda ittiham olunan və həmin ittihamı ilk prosesdən qətiyyətlə rədd edən MTN polkovniki Mirəziz Əsgərov Qubad Qubadova suallar verməyə başlayıb. 900 min dolların nə vaxt Zaminbanka daxil olduğunu soruşub. Mirəziz Əsgərov ardınca qeyd edib ki, MTN-ə daxil olan məlumata görə, həmin məbləğ adıçəkilən bankın hesabına iki-üç gün əvvəl oturdulub. Qubad Qubadov isə bildirib ki, elə həmin gün pul hesaba oturdulub. Mirəziz Əsgərov qeyd edib ki, Qubad Qubadov 20 min dollardan artıq pul qəbul edərkən həmin pul monitorinqləşdirilməlidir. O, Zamninbankın müdirindən 900 min dolları qəbul etməsi haqda Qubad Qubadovun Milli Banka niyə məlumat vermədiyini soruşub. Sonra Vidadi Əzizin xaricdən gələn məbləğin bir milyon dollar olduğunu dediyi halda Q.Qubadovun bunun 900 min ABŞ dolları olmasını məhkəmənin diqqətinə çatdırıb. Vidadi Əzizə 600 min dollar verildikdən sonra qalıq 300 min dolları MTN-ə apardığını deyən bank müdirinə polkovnikin cavabı da qısa olub. O, bildirib ki, mülki şəxsin MTN-ə girişi üçün ən azı nazir müavini və ya nazir şəxsən göstəriş verməlidir. Vidadi Əzizin günahı vardısa niyə tutmurdunuz? – sualına ittiham olunan polkovnik bildirib ki, zərəçəkən haqqında MTN-də 7 cinayət işi, kifayət qədər materiallar var: “Mənim səhvimi niyə siz təkrarlayırsınız, mən buraxdım, siz həbs edin. Bir də ki, möhtərəm hakim, vidadi haqqında siqnal materialların da işə əlavə edilməsini xahiş edirəm”. Hakim Elbəy Allahverdiyev isə Mirəziz Əsgərova “mən buraxdım, siz həbs edin” ifadəsinə görə xəbərdarlıq edib. Mirəziz Əsgərov isə 24 illik xidməti ərzində dürüst olduğunu, Azərbaycan dövlətinə, xidməti işinə və ölkə prezidentinə sədaqətli olduğunu bildirib. Bundan sonra zərərçəkən Vidadi Əziz keçmiş MTN əməkdaşlarını quldur dəstəsi adlandırıb və ittiham olunan Mirəziz Əsgərov isə təmsil etdiyi qurumda çox vətənpərvər, dövlətinə xidmət edən şəxslərin çalışdığını qeyd edib. Bütün işçilərə bu cür ləkə yaxmağın düzgün olmadığını vurğulayıb. Nəticədə tərəflər arasında mübahisə düşüb. Növbəti prosesdə keçmiş MTN əməkdaşı general Ədalət Əsədullayevin ifadə verməsi qərara alınıb. Məhkəmə prosesindən sonra hafta.az-a açıqlama verən vəkil Fazil Nəhmətov deyib ki, Mirəziz Əsgərovu 41 min manat rüşvət almaqda ittiham edənlərin özləri 900 min ABŞ dolları həcmində xaricdən həvalə yolu ilə qeyri-rəsmi şəkildə göndərilən pulu rəsmiləşdirmək istəyiblər. Proses 23 iyun saat 14:00-a qədər təxirə salınıb. Geri qayıt |