Dekabrın 5-də Nizami Kino Mərkəzində XVI Bakı Beynəlxalq Film Festivalının təntənəli açılışı olub.

Bu il festival çərçivəsində ümumilikdə 34 ölkəni əhatə edən 78 film Nizami Kino Mərkəzində beş gün müddətində saat 11:00-dan nümayiş olunacaq.

Bununla bağlı "Cebheinfo.az"-a açıqlamasında kino tənqidçisi, ssenarist, jüri heyətinin üzvü Nadir Bədəlov bildirib ki, festivaldakı filmlər onu kinematoqrafik baxımdan heyran edib:

“Filmlərlə bağlı təəssuratım yaxşıdır. Münsif olduğum bölmədə 10 tammetrajlı filmə baxmışam. O filmlərin hər biri kinematoqrafik baxımından yaxşıdır. Ola bilər ki, orada qoyulan məsələlər, müəllif münasibəti, mövqeyi, dünyagörüşü, fəlsəfəsi və s baxımdan bəyənməyim və ya razılaşmayım. Amma nədən danışırlar danışsınlar, onlar onu kinematoqrafik cəhətdən əsaslandıra bilirlər.

Yəni kino bu deməkdir. Söz öz yerində, eyni zamanda göz də burada iştirak etməlidir. Bu elə bir şeydi ki, ədəbiyyatın insanlara çatdıra bilirmədiyini kino çatdırır. Deməli kino həqiqətən də fərqlidir.

Mən burada müxtəlif dünyagörüşləri, müxtəlif baxışlar, yəni bunların hamısını gördüm və hər biri kinematoqrafik baxımdan əsaslandırılıb. Burada kino var. Kinonun dalıyca qaçmayıblar, birinci növbədə onları düşündürən öz dünyagörüşləri, öz fəlsəfəsidir. Ondan sonra kinematoqrafik cəhətdən əsaslandırıblar.

Mənə elə gəlir ki, bizdə müəyyən qədər bu cəhət çatmır. Bizim gənclər bu gün çox irəli gediblər. Çoxlu filmlər çəkirlər. Amma daha çox kinonun qayğısındadırlar nəinki dünyagörüşünün, nəinki siyasi baxışların, nəinki fəlsəfənin..."

Azərbaycanda yeni çəkilən filmləri necə dəyərləndirirsiniz sualına isə Nadir Bədəlov belə cavab verib:

"Azərbaycanda bu gün mənzərə rəngarəngdir. Ona görə ki, burada həm pisi, həm də yaxşısı var. Hazırda gənclər arasında yaxşı ssenarilər yazanlar mövcuddur. Əsas odur ki, dayanmayıb, donub yerində qalmayıb, bir hərəkət var. Hərəkət varsa, bu da özünü büruzə verəcək" .

Nadir Bədəlov sosial mediada müzakirəyə səbəb olan “Məhsəti” filmi ilə də bağlı mövqeyini açıqlayıb. O bildirib ki, həmin film münsiflik etdiyi bölməyə daxil olmadığı üçün izləməyib:

““Məhsəti” filmi haqqında heç bir söz deyə bilmərəm. Azərbaycan poeziyasının tanınmış nümayəndəsi Məhsəti Gəncəvinin ədəbiyyatımız tarixində özünəməxsus yeri var. Məhsəti Gəncəvinin poeziyasını oxuyuram. Amma baxmadığım bir film haqqında danışa bilmərəm".