Seçkilərdə iştirak, yoxsa boykot:
5-12-2019, 08:11
Milli Məclisin buraxılması və növbədənkənar seçkilərin təyin edilməsi ilə bağlı qərardan sonra, müxalif Milli Şura növbədənkənar Parlament seçkilərini boykot edəcəyini açıqlayıb. Bu bəyanat siyasi dairələrdə birmənalı qarşılanmır. Hazırda cəmiyyətdə, siyasi çevrələrdə “seçki, yoxsa boykot” müzakirələri gedir.
Məsələ ilə bağlı AYNA-ya açıqlama verən Müsavat Partiyası İcra Aparatının rəhbəri Gülağa Aslanlı, üzvü olduğu partiyanın növbədənkənar seçkilərlə bağlı qərarını yaxın günlərdə verəcəyini deyib: “Müsavat Partiyası parlamentin buraxılması və növbədənkənar seçkilərin keçirilməsi bağlı yaxın günlərdə iclas keçirəcək və iclasda partiyanın mövqeyi bəlli olacaq. Qeyd edim ki, Milli Şura boykot qərarı verməyib, sadəcə seçkilərlə bağlı bir neçə şərt irəli sürüb. Müsavat Partiyasının da bəzi şərtləri var ki, iclas zamanı bu şərtlər açıqlanacaq”.
“Seçki qanunvericiliyinin təkmilləşdirilməsi, proporsional seçki sisteminin tətbiqi, seçki komissiyyalarının siyasi əsaslarla təşkil olunması və digər məsələlərlə bağlı partiyamızın mövqeyi var. Amma bütün şərtlər və mövqelər müzakirəyə çıxarılacaq və həftəsonuna qədər rəsmi açıqlama veriləcək”, - G.Aslanlı bildirib.
ReAl Partiyasının icra katibi Natiq Cəfərli də, mənsub olduğu partiyanın qərarını AYNA-ya açıqlayıb: “Təxminən 1 il əvvəl Parlament seçkilərinin baş tutma ehtimalının yüksək olduğunu düşünürdük. Bununla bağlı da ictimaiyyətə həm məlumat ötürürdük, həm də fikirlərimizi çatdırırdıq. Hər şeyə rəğmən seçkilərdə iştirakın tərəfdarıyıq və iştirak edəcəyik. Bunun üçün də seçkilərə ciddi hazırlaşacaq və üzvlərimizin deputat mandatı qazanması üçün cəhd edəcəyik”.
N.Cəfərli boykot qərarını səhv addım hesab edir: “Azərbaycanda boykotun hüquqi və siyasi gücü yoxdur. Hüquqi gücü ona görə yoxdur ki, parlament seçkilərində iştirak məhdudiyyəti yoxdur. Hətta, hər dairədən 100 nəfər seçkilərdə iştirak etsə, seçkilər baş tutmuş hesab olunur. Bu baxımdan boykotun heç bir hüquqi əsası yoxdur. Siyasi əsası isə ona görə yoxdur ki, seçkini boykot etməyə çağıranlar, seçkilərə getməklə hakimiyyətin legitimlik qazanacağını hesab edirlər. Bunun isə heç bir siyasi əsası yoxdur. Çünki həmin təşkilat bu günə qədər onlarla seçkiləri boykot edib. Lakin bu, Azərbaycan hakimiyyəti üçün heç zaman legitimlik problemi yaratmayıb və yarada da bilməz”.
“Ona görə də boykotun effektlivliyi haqqında deyilən fikirlər ağlabatan deyil və siyasi cəhətdən məntiqli görünmür. İstənilən halda siyasi təşkilatın borcudur ki, həmişə seçkilərdə iştirak etsin və seçkilərin yaratdığı ab-hava və fürsətlər pəncərəsi vasitəsi ilə daha çox insanları demokratik dəyişikliklərə hazırlasın. Ona görə də biz ReAl olaraq seçkidə iştirak edəcəyik”, - deyə müsahibimiz vurğulayıb.
Mövcud siyasi mənzərəni AYNA-ya şərh edən politoloq Azər Rəşidoğlu da seçkilərdə iştirakın daha əhəmiyyətli olduğunu düşünür: “Əslində seçkilərin boykotundan söhbət gedə bilməz. Çünki boykot aktiv olmalı və nəticələrə təsir etməlidir. Bunun üçün seçkiyə getmək, bülletenləri götürmək və nəticə olaraq neçə nəfərin boykotda iştirak etdiyini nümayiş etdirmək olar”.
“Lakin Azərbaycandakı müxalif partiyalar daha çox passiv boykotdan istifadə edirlər. Yəni, tərəfdarlarını seçki məntəqələrinə getməməyə çağırırlar. Bununla isə neçə nəfərin seçkiyə getmədiyini və seçkini boykot etdiyini qətiyyən sübut etmək olmaz. Əslində bu cür üsullar, seçkilərin saxtalaşdırılmasına şərait yaradır. Bura əsas məsələ ondan ibarətdir ki, bu cür qərarların qəbulu onsuz da məğlubiyyətlə nəticələnir”, - siyasi şərhçi bildirib.
Rəşidoğlunun fikrincə, siyasi partiyanın başlıca vəzifəsi seçkilərdə iştirak etməkdən ibarətdir: “Buna görə də, partiya seçkilərdə iştirak etməli, seçki prosesində qanun pozuntularını nəzərə çatdırmalı və seçki prosesində məntəqə və dairələrdə seçki komsiyyalarının, o cümlədən Mərkəzi Seçki Komissiyasının qanun pozuntusuna yol verdiyini ictimaiyyətin nəzərinə çatdırmalıdır. Seçkilərdə iştirak etmədən də bunu həyata keçirmək mümkün deyil. İstənilən halda mən seçkilərdə iştirak etməyin tərəfdarıyam”.
Geri qayıt