Hakim partiyanın rəhbər şəxsindən ilginc açıqlamalar
9-05-2019, 08:22
Bakı ilə Brüssel arasında imzalanması nəzərdə tutulan saziş üzərində işlər tam başa çatmaq üzrədir. Bu arada Avropa İttifaqının Azərbaycandakı səfiri Kestutis Yankauskas deyib ki, strateji tərəfdaşlıq barədə yeni saziş üzrə danışıqlar davam etdirilir: “Sazişin tez bir zamanda imzalanması üçün mümkün olan işlər yerinə yetirilməlidir”.
Aİ nümayəndəsi Azərbaycan Prezidenti İlham Əliyevin Brüsselə tarixi səfəri haqda da danışıb. “Gələn həftə, Şərq Tərəfdaşlığının 10 illiyinə həsr olunmuş tədbirlərdə Prezident İlham Əliyevi Brüsseldə salamlamaqdan məmnuniyyət duyardıq” - Yankauskas Azərbaycanla əməkdaşlığa nə qədər böyük önəm verdiyinə işarə edib. Səfir Avropa Günü şərəfinə Bakıda keçirilən qəbulda deyib ki, Azərbaycan Aİ-nin mühüm tərəfdaşıdır və biz Azərbaycanla Avropanı bir-birinə daha da yaxınlaşdıracaq böyük bir razılaşma üzərində işləyirik.
YAP-ın icra katibinin müavini, Milli Məclisin komitə sədri Siyavuş Novruzov “Yeni Müsavat”ın bu və digər mövzularla bağlı suallarını cavablandırdı:
- Siyavuş bəy, Azərbaycan prezidenti Brüsseldə keçiriləcək tədbirə dəvət olunub. Hakim partiya Azərbaycanla Avropa İttifaqı arasındakı əməkdaşlığı və bu əməkdaşlığın perspektivlərini necə dəyərləndirir? Mümkündürmü elə bu səfər zamanı Avropa İttifaqı ilə Azərbaycan arasında saziş imzalansın?
- Təbii ki, Azərbaycan Avropa İttifaqı ilə sıx əməkdaşlıq edir. Burada iqtisadi sahədə çox böyük əməkdaşlıq var, 20 milyard avrodan artıq iqtisadi əməkdaşlığımız mövcuddur. İndiyə qədər mövcud olan əməkdaşlıq davam edir və bu, hər iki tərəf üçün məqbuldur. Görürsən, bəziləri tələm-tələsik Avropa İttifaqına daxil olur, heç Avropa standartlarına cavab vermədən istəyirlər ki, problemlərini Avropa çərçivəsində həll etsinlər. Bəziləri isə Avropa İttifaqına ona görə daxil olur ki, qrant alsın, borc alsın, öz iqtisadiyyatını bu qurumun hesabına qursun. Azərbaycan isə inkişaf etmiş bir ölkədir. Azərbaycanın istər qanunvericiliyi, biznes mühiti, iqtisadiyyata olan diqqət, iqtisadi inkişaf, sərmayələrin qoyuluşu üçün yaradılan şərait tam Avropa standartlarına cavab verir. Həmçinin qanunlarımız və həyat tərzimiz Avropa standartlarına tam uyğundur. Bu baxımdan Azərbaycanla əməkdaşlıq Avropa üçün heç bir problem yaratmır. Ona görə də ölkəmizlə əməkdaşlığı inkişaf etdirməkdə, daha da genişləndirməkdə maraqlıdır. Azərbaycan da bərabərhüquqlu tərəf kimi öz əməkdaşlığını davam etdirməyə hazırdır. Azərbaycan bloklara qoşulmamaq hərəkatının üzvüdür. Ölkəmiz heç bir bloka qoşulmur, yaxud da böyük-kiçik dövlət münasibətləri qurmur, sadəcə, bərabərhüquqlu qaydada münasibətlər qurur. Bu mənada güman edirəm ki, Avropa bu məsələni yetərincə dəyərləndirir.
- Sazişin imzalanması məsələsində konkretlik varmı?
- May ayında olacaq. Buna uzun müddətdir ki, hazırlıq gedir.
- Sazişdə ərazi bütövlüyümüzün Avropa İttifaqı tərəfindən tanınması ilə bağlı müddəanın əksini tapmadığı iddia olunurdu.
- BMT çərçivəsində ərazi bütövlüyünün, sərhədlərin tanınması ilə əlaqədar Avropa İttifaqı bir neçə dəfə qərar verib. Yəni digər postsovet ölkələrinə münasibətdə qurumun mövqeyi olub. Sərhədlərin dəyişməməsi Avropa İttifaqının əsas prinsiplərindən biridir. Münaqişələr nəticəsində hansısa ölkənin digər ölkədən torpaq qopartmaq istəyi Avropa prinsiplərinə ziddir. Elə Azərbaycan BMT-yə daxil olarkən də sərhədlər, tanınıb. Avropa İttifaqı da Azərbaycanın ərazi bütövlüyünü tanıyır və bunu qiymətləndirir. Bu da bizim üçün çox zəruridir.
- Azərbaycanın Avropa ailəsinə yaxınlaşmasına qarşı olan qüvvələrin hərəkətə keçməsi narahatlıq doğurmur ki?
- Təbii ki, Azərbaycanın əleyhinə fəaliyyət göstərənlər var. Onlar ayrı-ayrı adlar altında vəziyyəti gərginləşdirməyə çalışırlar. Həm daxildə, həm xaricdə olan qüvvələr, dairələr var ki, Azərbaycanın inkişafını istəmirlər. Yaxud məsələləri siyasi baxımdan şişirdib qabardan qüvvələr var ki, onların da qarşısının alınması üçün addımlar atılır. Avropa İttifaqı da görür ki, bütün bunlar yalandan quraşdırılmış qarayaxma kampaniyasıdır. Çünki Azərbaycanda hər bir insanın hüquqları qorunur. Həmçinin bütün siyasi, sosial hüquqlar qorunur. Bu baxımdan Azərbaycanda ciddi şəkildə inkişaf, ictimai-siyasi sabitlik var. Lakin xarici ölkələrdə bu və ya digər adlar altında sığınacaq almış şəxslər müxtəlif məsələləri şişirdirlər. Erməni lobbisi tərəfindən maliyyələşən Avropa Parlamentinin üzvləri, yaxud sapı özümüzdən olan baltalar var ki, bu gün Azərbaycanın Avropa İttifaqı ilə yüksələn xətlə inkişafını istəmirlər. Bu baxımdan da siyasi məhbus, digər məsələləri ortaya atırlar.
- Siyavuş bəy, belə bir həssas mərhələdə müxalifətin mitinqlərinə icazə verilməməsinin səbəbi nədir?
- Hər dəfə Bakı Şəhər İcra Hakimiyyəti məlumatlandırır ki, bunlar götürdüyü öhdəlikləri yerinə yetirmir. Burada hər hansı təxribat ola bilər və təxribata görə sərbəst toplaşma ilə əlaqədar bəzi məsələləri qeyd edir. Lakin bunlar ardıcıl şəkildə əllərində bir fakt olsun deyə, bu məsələni qabardırlar. Müxtəlif bəhanələri ortaya atırlar ki, Avropa İttifaqı ilə imzalanacaq sənədə kölgə salsınlar.
- Deməli, hakimiyyət təxribat ola biləcəyini nəzərə alıb mitinqlərə “yox” deyir?
- Burada iki məsələ var. Əvvəla, belə versiya var ki, bunlar mitinq keçirəndə özləri təxribat törədəcəklər, sonra bunu iqtidarın üzərinə atacaqlar. Bu, ən ciddi məsələdir. Bunlar da hansı partiyanın tərəfdarı olmasına baxmayaraq, Azərbaycan vətəndaşlarıdır, Azərbaycan dövləti onların təhlükəsizliyini müdafiə edir. O baxımdan da dövlət maraqlıdır ki, onlar təhlükəsiz yaşasınlar, çalışsınlar, fəaliyyət göstərsinlər. İkincisi də mitinqi təşkil edənlər həmişə xəbərdarlığa imza atırlar. Sərbəst toplaşma haqqında qanunda var ki, milli, dini ayrı-seçkilik, dini, milli qarşıdurma, silahlı çevriliş, dövlət çevrilişinə cəhd çağırışlarına yol verilməsin. Lakin öhdəlik götürmələrinə baxmayaraq, onlar hər dəfə bu öhdəliyi pozurlar, qəsdən təxribat törədirlər ki, polis bu məsələlərə müdaxilə etsin. Lakin polis səbirlə davranır və imkan vermir ki, bunlar təxribatdan bəhrələnsinlər. Beləliklə, onlar öz öhdəliklərinə əməl etmədikləri üçün növbəti mitinqlərə Bakı Şəhər İcra Hakimiyyəti tərəfindən icazə verilmir.
Geri qayıt