İşi-gücü sahibkarlarla "razborka" aparmaq olan başçı problemləri niyə görmür?
21-10-2014, 11:51
DİA.AZ: - Astara şəhər 2 saylı orta məktəb müəllimləri qışın erkən gəlməsindən narahat olsalar da, problemlərini söyləməyə ünvan tapa bilmirlər. DİA.AZ olaraq havaların soyumasından əndişə keçirən təhsil işçilərinin dediklərini diqqətinizə təqdim edirik:
“Bizim məktəb öz keyfiyyət göstəricilərinə görə nəinki rayonumuzda, eləcə də Respublikada seçilən tədris ocağıdır. Məktəbdə 60-a yaxın müəllim, təxminən 650 nəfərlik şagird heyəti var .
Çox təəssüf ki, 1987-ci ildən fəaliyyətə başlayan və şəhərin mərkəzində yerləşən bu təhsil ocağı indiyə qədər əsaslı təmir edilməyib.
Bizləri narahat edən isə tamam başqa məsələdir.
Sinif otaqlarının, burdaki şəraitin bərbad olmasına onsuz da vərdiş etmişik. Amma payızın, qışın adı gələndə canımıza üşütmə düşür. Çünki məktəbin istilik sistemi yoxdur. Adəmdən-Xatəmə, yəni, bu günədək sinif otaqlarını odunla qızdırırıq. Onu da tapa bilsək.Yazıq uşaqlar ordan-burdan çör- çöp yığıb bir təhər sinif otaqlarını qızdırırlar. Nə şəhərin meri, nə rayon təhsil şöbəsi, nə də bələdiyyə - heç kim durumumuzla maraqlanmır.
İcra başçımız Qəzənfər müəllimin isə işi-gücü sahibkarlarla “razborka” aparmaqdan ibarətdir.
Nə vaxtsa bizimlə maraqlansa məmnun olacağıq.
Qarşıdan qış gəlir, odun tədarükü məqsədilə məktəbin həyətinə cəmi 30 metrə yaxın uzunluğu olan kələ-kötür 3-4 ağac gətirib atıblar. Ötən ildə də belə oldu. Bu da cəmi 10-15 gün bizi gördü.
Yenə ümidimiz bir Allahadır, bir də fədakar şagirdlərimizin səyinə qalıb. Bu il də onların köməkliyiylə qışdan çıxa bilsək, sevinəcəyik”.
Geri qayıt