ERMƏNİ QOHUMLUĞU OLANLAR VƏZİFƏLƏRƏ NECƏ VƏ NİYƏ GƏTİRİLİB?
10-04-2021, 11:16
Bir çox qurumlarda ayrı-ayrı məmurların törətdikləri cinayətlərə, oğurluqlara, korrupsiyaya, insanlarımızın dövlətdən narazı salınmasına yönələn əməllərə nəzər yetirəndə, istər-istəməz dilimizə “bunu erməni də eləməz” ifadəsi gəlir.
Lakin bir qədər araşdırdıqdan sonra məlum olur ki, bu çirkinliklərin müəyyən bir qismi elə həqiqətən erməni qohumluğu, qarışığı olanların, başqa ölkələrin və qaranlıq qüvvələrin maraqlarına xidmət edənlərin "əlindən çıxır".
Son olaraq, mətbuatda XİN-in maliyyə məsələlərinin tapşırıldığı, nazirliyin maliyyə idarəsinin rəisi olmuş xanımın erməni kökləri barədə məlumat yayıldı.
Həmin məlumata görə, Lamiyyə Canəhmədovanın nənəsi erməni olsa da, uzun illər belə strateji əhəmiyyətli dövlət orqanında maliyyə idarəsinə rəhbərlik edib və quruma büdcədən ayrılan vəsaitlərin talanmasında, bu strateji qurumda korrupsiyanın çiçəklənməsində müstəsna rol oynayıb. Göründüyü kimi, söhbət bir ölkənin XİN sistemindən, onun gəlir və çıxarlarından gedir.
Hələ məsələnin maliyyə və korrupsiya tərəfini bir kənara qoyaq (Ancaq unutmayaq ki, korrupsiyanın özü də vətənə xəyanət qədər ağır cinayətdir və xəyanətin bir növüdür. Çünki dövlətin dayaqlarını sarsıdır-red). Məsələnin bir də təhlükəsizlik, kəşfiyyat, məxfi məlumatların ötürülməsi kimi tərəfləri var. Söhbətin XİN-dən getdiyini nəzərə alsaq, bunun nə demək olduğunu anlamaq çətin deyil...
Bundan bir müddət əvvəl isə Dövlət Gömrük Komitəsinin sabiq sədr müavini, deputat, politoloq Cümşüd Nuriyev Azərbaycan gömrüyündəki qanunsuzluğun, özbaşınalığın, monopoliyanın təməlini qoyanlardan biri hesab olunan və bu yolla böyük var-dövlət sahibinə çevrilən Əbülfəz Məlikovun həyat yoldaşının Rusiya Erməniləri İttifaqının rəhbəri, milyarder Ara Abramyanın bacısı olduğunu bildirmişdi.
“Broker” MMC-nin rəhbəri və uzun illər ölkənin əsas gömrük monopolisti sayılan Əbülfəz Məlikov tərəfindən bu məlumat təkzib olunmadı.
Daha əvvəl isə AMEA Prezidenti Ramiz Mehdiyevin, “Qaçqınkom”-un sabiq rəhbəri Əli Həsənovun, «Azərenerji» Səhmdar Cəmiyyətinin sədri Etibar Pirverdiyevin və yüksək vəzifələr tutmuş, deputat mandatı verilmiş, rektor olmuş, lakin adlarını çəkmədiyimiz daha kimlərin erməni qohumluğuna dair mətbuatda, sosial şəbəkələrdə çoxsaylı məlumatlara rast gəlinib. Özü də bu məlumatların böyük əksəriyyətinin həqiqət olduğu şübhə doğurmur. Belə çıxır ki, Azərbaycanda yaşadığı bildirilən 30 min erməninin az qala hamısının hökumətdə müxtəlif vəzifələrdə yaxın, ya uzaq qohumları var...
Araşdıran olsa, hüquq-mühafizə orqanlarında, ayrı-ayrı nazirliklərin rəhbər strukturlarında, bank-maliyyə sektorunda, hətta orduda da erməni qohumluğu olan çoxlu sayda kadr tapmaq mümkündür. Belə olan təqdirdə kim təminat verə bilər ki, bu şəxslər “5-ci kolon”un təmsilçiləri deyillər və hansısa bir şəbəkə formasında fəaliyyət göstərmirlər?
Bu adamların əsasən hakimiyyət daxilində söz sahibi olan, anti-milli mövqedə dayanan, Moskvaya xidmət edən və “akademik bacarıqlara” malik biri tərəfindən bilərəkdən idarəetmə strukturlarına yerləşdirildikləri də şübhə doğurmur.
Düşmən ermənilərlə bağlıqları olduğundan milli təəssübkeşlikdən məhrum olan bu şəbəkənin təmsilçiləri uzun illər korrupsiyadan tutmuş məxfi məlumatların ötürülməsinə qədər, eləcə də digər vəzifə cinayətlərini törətməklə dövlətin dayaqlarının sarsıdılmasına bilərəkdən, ya bilməyərəkdən xidmət ediblər?
Təkcə yuxarıda adlarını çəkdiyimiz şəxslərin XİN-də və gömrükdəki fəaliyyətini nəzərə alsaq, bunların dövlətə, xalqa qarşı qəsdən törədilən cinayətlərini görmüş olarıq. Böyük ehtimalla, erməni qohumluqları olduğu bildirilən bu adamları həmin qurumlarda qəsdən “bulağın gözündə” otuzdurublar. Bütün bunların məlum qonşumuzun Azərbaycanda yaratdığı şəbəkənin, adı “5-ci kolon” qoyulan yapılanmanın başında durmuş şəxslərin planlı şəkildə həyata keçirdiyi kadr siyasəti olduğu real görünür.
Doğrudur, heç bir erməni qohumluğu olmayanlar arasında da vicdanını pula satanlar kifayət qədərdir. Ancaq qanı ora-bura calanmayanların millətə, onun sərvətinə, yaşayışına bu dərəcədə qənim kəsilməsi ehtimalı azdır...
Məsələn, uzun illər gömrükdəki monopoliyanın bu xalqa, dövlətə, iqtisadiyyatımıza, biznes mühitinə vurduğu ziyanı bəlkə də heç bir erməni raketi, hətta barəsində gecə-gündüz danışılan “İskəndər” də vura bilməzdi. Yaxud, XİN, MTN, ordu, prokurorluq, hüquq-mühafizə orqanları və digər dövlət qurumları olsun.
Onların gözdən salınmasının, “əşşi, bizdə heç vaxt normal dövlət olmayacaq” fikrinin formalaşmasının, bununla da Azərbaycanda dövlətçilik anlayışına zərbə vurulmasının ən effektiv yollarından biri, təbii ki, xalqdan, millətdən uzaq, qanı təmiz olmayan şəxslərin həmin qurumlarda yüksək vəzifələrə çəkilməsi idi ki, buna da yuxarıda qeyd etdiyimiz qüvvə xeyli dərəcədə nail oila bilmişdi.
Təbii ki, erməni qohumluğu olan şəxslərin hamısını xəyanətdə və s. ittiham etmək doğru olmaz. Ancaq ən azından əksər hallarda Azərbaycan dilində danışmağı belə özünə yaraşdırmayan, onu bəyənməyən, özünü bizdən hesab etməyən insanların vətənə, xalqa nə dərəcədə bağlı olduqlarını düşünək. Təbii ki, belələrinin məlum xarici dövlətin kəşfiyyat orqanının əlində asanlıqla alətə çevrilməsi ehtimalı daha yüksəkdir.
Lap tutaq ki, bu şəxslərin hər hansı mütəşəkkilliyi, dövlətə qarşı birgə düşünülmüş qəsdi filan da yoxdur. Hətta bu halda belə, onlara tam güvənmək riskli deyilmi? Olmazmı ki, xüsusilə strateji önəm kəsb edən sahələrə təyinatlarda şəxslərin milli mənsubiyyəti, qan qohumluğu kimi məsələlər nəzərə alınsın? Axı nə qədər arzulasaq da, biz tam müasir, inkişaf etmiş, qayğılardan, təhdidlərdən uzaq hansısa ada dövləti, yaxud neytral Avropa ölkəsi deyilik, əksinə, hər tərəfdən bizə qarşı düşmən mövqedə olan dövlətlər, rejimlərlə əhatə olunmuşuq...
İndi çoxları artıq “5-ci kolon”un başının əzildiyini, onun liderinin prosesdən kənarlaşdırıldığını düşünür. Lakin unutmayaq ki, uzun illər ərzində formalaşan bu şəbəkə bütün strukturlara sirayət edib, o, hələ güclüdür, onun xaricdəki dayaqları və havadarları isə öz yerindədir.
Bu şəbəkənin məhv edilməsi prosesi yeni başlayıb. Onların vəzifələrə necə və niyə gətirildiyinə dair həqiqətlər də yəqin ki, şəbəkə tam məhv edildikdən sonra açılacaq. Ancaq dövlətin bütün strukturlarına öz adamlarını yerləşdirmiş bu xain şəbəkənin ifşasının və məhv edilməsinin heç də asan olmayacağı məlumdur...
Hər halda Azərbaycanın bu çayırdan təmizlənməsinə ən azı Türkiyədə hələ də mübarizə aparılan FETÖ-nün təmizlənməsinə sərf olunan qədər qüvvə və vaxt sərf etməli olacağıq...
“AzPolitika.info”
Geri qayıt