“Hacı Qalib deyir ki, Bilgəhdə qanun mənəm...”
25-09-2020, 10:35
“9 il istintaq olar? Bax bu sualın cavabını istəyirəm. Baş prokuror Kamran Əliyevin qəbuluna düşmək istəyirəm, Qalib Salahzadə imkan vermir. Baş Prokurorluğa gedirəm, hər dəfə bir söz deyib geri qaytarırlar. Ona görə də Kamran Əliyevə müraciət edirəm ki, 9 illik biabırçılığa son qoysun” - Seymur Quliyev belə deyir. Onun sözlərinə görə, Hacı Qalib Salahzadə dövlətə güc göstərir:
“Qalib Salahzadə də hər yerdə deyir ki, Bilgəhdə qanun mənəm. 9 ildir ki, istintaq gedir, bu adam gəlini, hörmətli Şeyxin qızı Xatirə Allahşükür qızının arxasında gizlənir. Mən Şeyxin qəbuluna da getmişəm, deyiblər ki, o, bu işlərə qarışmır, Seymur haqlıdır, gedib torpağına sahib çıxsın. Yəni Qalib Salahzadə özünü qorumaq üçün hər kəsin, respublikada tanınan hörmətli adamların adını çəkir, tanınmış isimlərin adlarının arxasında gizlənməyə adət edib. Bu gün arxasında gizlənməyə artıq ad tapmır. Çünki kimin adını çəkibsə, qəbulunu getmişəm, hər kəs də etdiyi qanunsuzluğun aradan qaldırılmasını tapşırıb. Hacı Qalib indi də Baş Prokurorluğun adı arxasında gizlənir. Ona görə də baş prokuror Kamran Əliyevə dönə-dönə müraciət edirəm, məni qəbul etsin. Mən Azərbaycan vətəndaşıyam. Əmlakım qəsb olunub. 9 ildir ki, istintaq gedir.
Hacı Qalib Salahzadənin oğlu Əliabbas Salahzadə
Əmlakım 9 il əvvəl deputat olan Hacı Qalib Salahzadə tərəfindən zəbt olunub. Daxili İşlər Nazirliyi əmlakımın qəsb olunması, dağıdılması, uşaqlarımın oyuncaqlarının belə dağıdılan əmlakdan oğurlanması faktlarını araşdırıb, istintaq bu ilin əvvəlində yekunlaşıb. İş materialları 7 ay əvvəl Baş Prokurorluğa göndərilib. Qalıb Baş Prokurorluğun qərar verib müəyyən etməsi ki, işi prokurorluq orqanı tam olaraq yekunlaşıdırıb məhkəməyə göndərsin, yoxsa elə Daxili İşlər Nazirliyinin istintaq orqanı bunu etsin. Qanuna görə bu qərar 24 saat ərzində verilməli idi. Bu qərar verilmir”.
Seymur Quliyev
Seymur Quliyev deyir ki, baş verənlərlə bağlı dəfələrlə baş prokuror Kamran Əliyevin qəbuluna düşmək istəyib, lakin buna da imkan verilməyib: “Ötən həftə Baş Prokurorluğa teleqram da vurdum. Xahiş etdim ki, Kamran Əliyev məni qəbul etsin. Teleqrama cavab verilmədi. Baş Prokurorluğa zəng etdim. Orada idarə rəisinin müavini Elşən Əliyevlə danışdım. Dedim ki, işçisi Royal Xankişiyev işin həvalə edilməməsi ilə bağlı adekvat cavablar vermir, 7 aydır ki, cinayət işi həvalə olunmur. İstintaq aparılıb, amma həvalə olunmur. Dedi ki, istintaq aparılıbsa, mümkün deyil ki, həvalə qərarı verilməsin. Cavab verəcəklərini dedi. Amma yenə də cavab vermədilər”.
Seymur Quliyev deyir ki, baş verənlər haqda şəxsən baş prokurora məlumat verib tədbir görülməsini istəyir: “İnanıram ki, Kamran Əliyev baş verənlər haqda xəbər tutsa, mənə qarşı cinayətlərə son qoyulacaq”.
“Yeni Müsavat”
Geri qayıt