Təhsil Nazirliyi rəsmisinin “Alov”la şübhəli sövdəsi
15-03-2019, 10:19
Azərbaycanda bir çox dövlət qurumlarında yüksək vəzifələr tutan şəxslərin öz mövqelərindən istifadə etməklə, onlara yaxın şirkət və firmalarla əlbir olub, büdcə vəsaitini mənimsəmələri faktları adi hal alıb. Bu proses əsas etibarilə şübhəli tenderlərin “qalibləri” vasitəsilə həyata keçirilir.
Ölkə prezidenti və hüquq-mühafizə orqanları ilə yanaşı “AzPolitika.info”-ya müraciət edən Binəqədi rayon Zahid Qənbərov küçəsi 11 A, ev 52 ünvanında yaşayan Hüseynov Zaur Mehdi oğlunun şikayət məktubunda göstərilənlər də bu qəbildəndir. Həmin məktubda büdcədən ayrılan külli miqdarda vəsaitin “Alov” Mühafizə Xidmətinin rəhbərliyi tərəfindən talandığı bildirilir.
Z.Hüseynov iddia edir ki, 2017-ci ilə qədər “Riyad” Mühafizə Xidməti kimi fəaliyyət göstərən, sonradan isə adı dəyişdirilərək “Alov” Mühafizə Xidməti kimi qeydiyyata alınan şirkətin rəhbərliyi o qədər də mürəkkəb olmayan mexanizm vasitəsilə il ərzində 100 minlərlə manat büdcə vəsaitini mənimsəyir.
Şikayətçinin yazdığına görə, “Alov”-un rəhbərliyi, daha dəqiq desək, baş direktoru İlqar Rzayev əlaqələrindən istifadə etməklə, Təhsil Nazirliyinin tenderini qazanıb və nazirliyin tabeliyində olan internat məktəblərinin mühafizəsi üçün ildə 1 milyon 800 min (bir milyon səkkiz yüz min) manat vəsaitin ayrılmasına nail olub: “İlqar Rzayev Təhsil Nazirliyində işləyən dostu Rauf Orucovla (Nazirliyin iqtisadiyyat şöbəsinin müdiri-red.) əlbir olaraq, saxta yolla tender keçirməklə, nazirliyin tabeliyində olan internat məktəblərin mühafizəsi adı altında “Alov” Mühafizə Xidməti vasitəsilə ildə büdcəyə 1 milyon 800 min manat zərər vurur və talayır. Hər ay bu məqsədlə Təhsil Nazirliyi tərəfindən “Nikoil“ Bankın Nərimanov filialına 150 min manat köçürülür və bu vəsait İ.Rzayev tərəfindən götürülür”.
Z.Hüseynov iddia edir ki, həmin 150 min manatın cəmi 40 min manatı maaş kimi mühafizəçilərə ödənilsə də, yerdə qalanı mənimsənilir: “Bakıda çalışan hər mühafizəçiyə nəzərdə tutulan 700-800 manat maaşın cəmi 200 manatı ödənilir. Rayonlarda yerləşən internat məktəblərində isə ümumiyyətlə, “Alov” Mühafizə Xidmətinin mühafizəçiləri yoxdur. Həmin məktəblərin mühafizəsi üçün nəzərdə tutulan puldan 400 manat məktəb direktorlarına ödənilir…”
Göründüyü kimi, məktubdan belə nəticə çıxır ki, rayon və kənd internat məktəblərinin sözügedən şirkət tərəfindən mühafizəsi ümumiyyətlə təşkil olunmur və vəsaitin bir qismi məktəb direktorlarına çatır.
Şikayətçi bildirir ki, bu proses artıq 8 ildir davam edir və bunun sayəsində İ.Rzayev böyük var-dövlətə, obyektlərə, evlərə və avtomobillərə sahiblənib.
Z.Hüseynov məktubunda hətta “Alov”-un ayrı-ayrı filiallarının adına rəsmiləşdirilmiş həmin avtomobillərin nömrələrini və markalarını da göstərir: “10-MA-700” Mercedes Gelendwagen, “90-OC-200” Porshe Cayenne, “90-AA-275” Toyota Corolla, “90-AA-075” Toyota Camry, “90-AA-032” S Class Mercedes”.
Z.Hüseynov “Alov” Mühafizə Xidmətinin əməkdaşlıq etdiyi internat məktəblərin siyahısını da məktubuna əlavə edib. Siyahıya ucqar Xınalıq kənd internat məktəbindən tutmuş, Lerikdəki internat məktəbinə qədər, 60 təhsil müəssisəsinin adı daxildir.
Sonda ölkə başçısına müraciət edən şikayətçi bu işin hüquq-mühafizə orqanları tərəfindən araşdırılmasını və külli miqdarda büdcə vəsaitinin bu yolla talanmasının qarşısının alınmasına dair göstəriş verilməsini xahiş edir.
Müraciətdəki ittihamlara aydınlıq gətirməsi üçün “Alov” Mühafizə Xidmətinə sorgu göndərdik. Xidmətdən sorgumuza rəsmi cavab yazmasalar da, zəng edərək bildirdilər ki, müraciətdə göstərilənlərin heç biri həqiqətə uyğun deyil. Əlavə məsələlər barədə isə açıqlama vermək istəmədilər.
Bununla belə müraciətdə göstərilənlərlə bağlı “Alov” Mühafizə Xidmətinin baş direktoru İlqar Rzayevin, eləcə də Təhsil Nazirliyinin mövqeyini işıqlandırmağa hazırıq.
Geri qayıt