Eldar Mahmudovla Mövlam Şıxəliyev barəsindəki qərardadı “gedər-gəlməz”ə yollayıblar
7-09-2017, 10:36
Milli Təhlükəsizlik Nazirliyinin ləğvi ilə başlanan hakimiyyətdaxili “təmizləmə” əməliyyatının üzə çıxardığı qanunsuzluqlar hazırda məhkəmələrdə araşdırma predmetidir. Mətbuatda “MTN işi” adlandırılan iş üzrə Bakı Hərbi Məhkəməsində 4 ayrı-ayrı hakimin icraatında proses aparılıb. Həmin proseslərdən 2-si artıq yekunlaşıb. Maraqlıdır ki, proseslərin hər birində qanunsuzluqların bu və ya digər şəkildə sabiq MTN şefinin razılığı ilə baş tutduğuna əsaslı şübhələr olsa da, zərərçəkənlər Eldar Mahmudovun məhkəməyə gətirilməsini israrla tələb etsələr də, bu baş vermədi. Görünən odur ki, “MTN işi” üzrə proseslər “baş qəhrəman”sız yekunlaşır.
Ləğv edilmiş MTN-in İstintaq Baş İdarəsi 2-ci istintaq şöbəsinin sabiq rəisi Vüsal Ələkbərovun və artıq olmayan qurumun Baş Əks-Kəşfiyyat İdarəsinin sabiq şöbə rəisi, polkovnik Mirəziz Əsgərov məhkəməsi bir müddət əvvəl yekunlaşıb.
Bakı Hərbi Məhkəməsində hakim Siyavuş Hacıyevin sədrliyi ilə yekunlaşan prosesdə Vüsal Ələkbərov 12 il müddətinə azadlıqdan məhrum edilib. Məhkəmə polkovnikin rütbəsinin əlindən alınması barədə xüsusi qərardad çıxarıb. Hökmə görə, Vüsal Ələkbərovun əmlakı müsadirə edilərək zərərçəkmiş iş adamı Akif Qurbanova verilməsi barədə qərar qəbul edilib. Vüsal Ələkbərov kimi Mirəziz Əsgərov da 2015-ci ilin oktyabrında MTN ətrafında məlum hadisələrdən sonra həbs olunub. Ona Cinayət Məcəlləsinin 182.3.2-ci (külli miqdarda əmlak əldə etmək məqsədi ilə hədə-qorxu ilə tələb etmə), 308.2-ci (vəzifə səlahiyyətlərindən sui-istifadə etmə), 309.2-ci (vəzifə səlahiyyətlərini aşma), 311.3.3-cü (külli miqdarda rüşvət alma) maddələrinə əsasən ittiham irəli sürülüb. Polkovnik Mirəziz Əsgərov 2 il rəhbər vəzifə tutmaq hüququndan məhrum edilməklə, 5 il müddətinə azadlıqdan məhrum edilib. M.Əsgərov hədə-qorxu ilə Vidadi Əzizov adlı iş adamından 350 min pul almaqda ittiham olunub. Məhkəmə həmçinin sabiq milli təhlükəsizlik naziri və həmin nazirliyin baş istintaq idarəsinin rəisi olmuş Mövlam Şıxəliyevin barəsində cinayət işinin başlanması ilə bağlı xüsusi qərardad çıxarıb və həmin qərarın surəti icra olunması üçün aidiyyəti üzrə prokurorluğa göndərilib.
Bu qərardadın taleyi qaranlıqdır. 1 aydan çoxdur ki, V.Ələkbərovun işi üzrə hökm çıxarılıb. Lakin Eldar Mahmudov Mövlam Şıxəliyevin barəsində cinayət işinin başlanması ilə bağlı xüsusi qərardadla bağlı hər hansı bir addım atılmayıb. Ümumiyyətlə, 11 il MTN-ə rəhbərlik etmiş Eldar Mahmudov həmin proseslərdə heç bir statusda - nə təqsirləndirilən, nə də şahid qismində iştirak etmir.
Bakı Hərbi Məhkəməsinin icraatında MTN-in sabiq baş idarə və idarə rəisləri - generallar Sübahir Qurbanov, Teymur Quliyev, Natəvan Mürvətova, həmin qurumun vəzifəli şəxsləri Füzuli Əliyev, Zaur Məmmədov, Natiq Alıyev, Fərhad Atayev, Anar Şirəliyev, Eşqin Əliyev, Elşad Əzizovun barəsində olan cinayət işi üzrə də məhkəmə araşdırmaları aparılır. Hakim Həbib Həsənovun sədrliyi ilə davam etdirilən prosesdə hazırda şahid və zərərçəkənlərin ifadələri dinlənilir.
İttihama əsasən, təqsirləndirilən şəxslər 2004-2015-ci illərdə mütəşəkkil dəstə tərkibində xidməti vəzifələrinin icrası ilə əlaqədar hakimiyyətdən və öz qulluq mövqelərindən sui-istifadə ediblər.
Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslərə məxsus ümumilikdə 21 milyon 528 min manat dəyərində əmlak və pul vəsaitlərinin, o cümlədən 20 milyon 971 min manat dəyərində daşınmaz əmlak, 272 min manat dəyərində nəqliyyat vasitələri, 42 min manat dəyərində zərgərlik və digər qiymətli məmulatlar, 88 min manat, 88 min ABŞ dolları və 5 min Avro nağd pul vəsaitləri üzərinə həbslər qoyulub.
“MTN işi” üzrə yekunlaşmaqda olan daha bir proses Bakı Hərbi Məhkəməsinin sədri Həbib Həsənovun sədrliyi ilə baş tutub. Ləğv olunmuş nazirliyin Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanova artıq prokuror cəza istəyib.
Hazırda təqsirləndirilən şəxslərin vəkillərinin müdafiə çıxışı mərhələsidir. Xatırladaq ki, dövlət ittihamçısı çıxışında A.Çovdarovun rütbələrdən, fəxri adlardan məhrum edilməklə 15 il, S. Məmmədovun 12 il, O.Osmanovun 9 il və A.Əliyevin 9 il müddətinə azadlıqdan məhrum edilməsini istəyib. Dövlət ittihamçısı S.Məmmədov, O.Osmanov və A.Əliyevin də rütbələr və fəxri adlardan məhrum olunmasını tələb edib. Prokuror Dövlət Təhlükəsizliyi Xidmətinin verdiyi mülki iddianın təmin edilməsini istəyib. Bundan başqa, zərəçəkmişlərin mülki iddiasında maddi zərərin vurulmasında məhkəmənin mülahizəsinə buraxmasını bildirib, mənəvi zərərin ödənilməsinin təmin olunmamasını xahiş edib.
Cinayət işi üzrə 320-dən çox şahid, 60-dan çox isə zərərçəkmiş var. Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər A.Çovdarov, S.Məmmədov, A.Əliyev və O.Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbs qoyulub.
Musavat.com
Geri qayıt