Müharibə içində “müharibə”
9-11-2024, 14:10
Polşa ilə Ukrayna arasında münasibətlər gərgin olaraq qalır, o cümlədən Ukrayna rəhbərliyi Polşa rəhbərliyinə qarşı ictimai ittihamlar səsləndirir. Belə ki, ötən həftə Zakarpat vilayətinin ərazi icmaları və rayonlarının rəhbərləri ilə görüşdə Ukrayna Prezidenti Vladimir Zelenski növbəti belə bəyanatla çıxış edib.
Onun sözlərinə görə, Polşa Şimali Atlantika Alyansı (NATO) ilə ilkin razılaşmalara baxmayaraq, MiQ-29 qırıcılarını Kiyevə verməmək qərarına gəlib: “Ukrayna Polşadan təyyarə almaq istəyirdi, lakin Varşava öz ehtiyacları üçün təyyarə çatışmazlığı səbəbindən onları təmin edə bilmədi”.
Buna görə də Kiyev NATO ilə razılaşıb ki, hərbi-siyasi blok 2004-cü ildən səmalarının digər müttəfiqlər tərəfindən qorunduğu Baltikyanı ölkələrdə olduğu kimi Polşaya da polis missiyası ayıracaq: “Bununla razılaşdıq. Bəs bundan sonra Polşa bizə təyyarə verdimi?”.
Polşanın xarici işlər naziri Radoslav Sikorski “Polsat” telekanalında bu açıqlamanı şərh edib: “Biz bu bəyanatın mənbəyini öyrəndik, bu, müharibənin necə getdiyinə dair daha geniş, kortəbii bir bəyanat idi”.
Bu, Ukrayna Prezidentinin bəyanatının mənfi təsirini azaltmaq cəhdi idi. Polşa xarici işlər naziri əlavə edib ki, Ukrayna həqiqətən də çətin günlər yaşayır: “Ona görə də, gəlin çətin anlar yaşayan Prezidentə anlayış göstərək. Bununla belə, biz hər hansı bir ölkədən daha çox iş görmüşük”.
Bu, doğrudur. Polşanın Ukraynaya yardımı təkcə hərbi xarakter daşımırdı. Xüsusən də, Varşava Kiyevə xeyriyyəçilik məqsədilə 60 metro vaqonu bağışlayıb. Onlar ağ və qırmızı rəngdədir. İçəridə onlar rahat qırmızı məxmər divan oturacaqları ilə təchiz olunub. Xüsusən də Rusiyanın Ukraynaya qarşı genişmiqyaslı təcavüzə başlamasından bir il yarım sonra Polşadan Ukraynaya təmənnasız yardımın çoxlu nümunələri var.
Amma indi Varşava xatırladır ki, Polşa qonşuları Rusiya və Ukrayna olan yeganə Avropa İttifaqı (Aİ) və NATO ölkəsidir. Sikorskinin sözlərinə görə, “Ukrayna başa düşür ki, biz də Putini cilovlamalıyıq” və “bizim öz müdafiə ehtiyaclarımız var”. Onun sözlərinə görə, Donald Tusk hökuməti Ukraynanın bərpadan sonra geri ödəməsi şərti ilə müdafiə krediti təklif edib.
"Bu, əvvəldən edilə bilərdi: burada, zəhmət olmasa, Polşa fabriklərindən kreditlə silah alın və bərpa edildikdən sonra ödəyin", - deyə polşalı nazir söyləyib.
Sadə dillə desək, Polşa Xarici İşlər Nazirliyinin rəhbəri Ukraynaya ən azı silah tədarükü baxımından xeyriyyəçilik dövrünün bitdiyinə işarə edib. Qeyd edək ki, ukraynalı bloger Yuri Romanenko öz “Facebook” səhifəsində yazıb ki, Radoslav Sikorskinin bəyanatı çox düzgün və vaxtında edilən təklifdir.
“Müharibə boyu bizim həvəskarlarımız qonşuları çaşdırdılar və qərara gəldilər ki, hər kəs onların mövcudluğu faktına görə onlara borcludur. Eyni zamanda, Polşa bazarına diktə edə bilərlər. Polşanın Rusiya raketlərini NATO ilə koordinasiya etmədən vurmaq borcu barədə daim axmaq iddialar səsləndirə bilərlər. Beləliklə, Ukrayna hakimiyyəti “95-ci kvartal”ın qürurunu sığallamq üçün bir milyard dolları boş yerə ata, UGS yaxınlığındakı Stryi bölgəsində hava hücumundan müdafiə sistemlərinin quraşdırılması üçün bir milyard dollar tapa bilər. Bizim parlaq menecerlərimizin məntiqlə dostluq etməyə başlamasının vaxtı gəldi”, - deyə Romanenko qeyd edib.
Təkcə onu əlavə edək ki, bu yaxınlarda Ukrayna Prezidenti Zelenski bəyan etdi ki, tezliklə hər bir ukraynalı 1000 qrivna birdəfəlik yardım ala biləcək. Bu pul kommunal xidmətlərin, biletlərin və Ukrayna mallarının ödənilməsinə xərclənə bilər. Prezidentin təşəbbüsü ilə 1000 qrivnanın ödənilməsinə 30 milyard qrivna ayrılacaq. Bu pul Pensiya Fondundan götürüləcək. Bu barədə brifinqdə Ukraynanın xalq deputatı Olqa Vasilevskaya-Smaqlyuk məlumat verib.
Bir çox ukraynalı politoloq, jurnalist və bloger bu addımı yersiz, lakin Zelenskinin yenidən ölkə Prezidenti seçilməyə hazırlaşmasının göstəricisi adlandırıb. Üstəlik, o, reytinqinin sürətlə aşağı düşməsini birtəhər dayandırmalıdır. Bununla bağlı qeyd etmək istərdim ki, Ukrayna Silahlı Qüvvələrinin keçmiş rəhbəri, hazırda isə Ukraynanın Böyük Britaniyadakı səfiri Valeri Zalujnı ukraynalılar arasında ən böyük etimada malikdir - respondentlərin 37,8%-i ona tam etibar edir və daha 37,5% ona daha çox inanır. Eyni zamanda, respondentlərin yalnız 16,2%-i ona tam və ya qismən etimadsızlıq edir. Beləliklə, Zalujnının etibar və etibarsızlıq balansı +59% təşkil edir.
Etibar baxımından ikinci yerdə Ukrayna Müdafiə Nazirliyinin Baş Kəşfiyyat İdarəsinin rəisi Kirill Budanov qərarlaşıb. Respondentlərin 20,8%-i ona tam etibar edir, 36,9%-i isə daha çox güvənir. Budanovun ümumi etibarsızlıq səviyyəsi müvafiq olaraq 24%, etibar balansı isə +33,7% təşkil edir.
Və yalnız üçüncü yerdə Ukraynanın hazırkı Prezidenti Vladimir Zelenski dayanır. Respondentlərin 49,2%-i ona tam və ya qismən etibar edir, 44,5%-i isə tam və ya qismən etibar etmir. Beləliklə, Ukrayna Prezidentinə inam balansı +4,7% təşkil edir.
1000 qrivnanın əhaliyə paylanması isə ukraynalı ekspertlərin fikrincə, Zelenskinin reytinqinin aşağı düşməsini dayandırmağın yollarından biridir. Eyni zamanda bütün bu addımları Polşada da görürlər. Fərqli, praqmatik əməkdaşlıq modeli təklif edirlər. Necə deyərlər, şəxsi heç bir problem yoxdur, sadəcə biznes.
AYNA.az
Geri qayıt