"Nəticələrə etiraz olaraq, müəyyən qədər insan küçələrdə gəzişəcək, sonra da ya özləri dağılışacaqlar, ya da polis dağıdacaq"
10-09-2021, 08:15
Sentyabrın 17-də keçiriləcək parlament seçkiləri Rusiya siyasi cameəsinin əsas mövzusudur. Rusiyada seçkiqabağı vəziyyətin necə inkişaf etdiyini AYNA-ya şərh edən tanınmış politoloq Aleksandr Sıtinin sözlərinə görə, hökumət nədənsə açıq şəkildə qorxur və bu qorxu hər seçkiqabağı baş verir.
“Bu, hakimiyyətin təbii vəziyyətidir. Birincisi, istənilən qərəzsiz insan üçün heç bir şeyin dəyişməyəcəyi və prinsipcə dəyişə bilməyəcəyi aydındır. Seçkilərdə eyni partiyaların hamısı iştirak edir, onların imkanları əvvəlki seçkilərdən və indiki Dumadakı deputatlarının sayından bəllidir. Partiyalar tərəfindən və ya daha çox cəmiyyət tərəfindən qətiliklə heç bir şey dəyişməyib. Beləliklə, hər hansı bir irəliləyişdən, çox sayda insanın gözlənilmədən, birdən-birə “Yabloko” partiyasına səs verməyə qaçacağı haqqında danışmaq üçün ən kiçik bir səbəb də yoxdur”, - deyə ekspert bildirib.
İkincisi, analitikə görə, “Yabloko” partiyasının və ya indiki Dumada olmayan başqa birinin beş (5) mandat alacağını düşünsək belə, heç nə dəyişməyəcək: “Nə olsun? Onlar bütün real gücün icra hakimiyyətinin əlində cəmləşdiyi bir ölkədə siyasi vəziyyəti dəyişdirəcəklərmi? Şəxsən mən seçkiləröncəsi hakimiyyətin həyəcanını və qorxusunu heç cür anlamıram. Dumanın icra hakmiyyətinə təsir edəcək qədər tərkibini və istiqamətini dəyişməsi üçün əslində nələrin baş verməli olduğunu təsəvvür etmək hələ də mümkün deyil”.
Parlamentdə yeni partiyalar gözləyib-gözləməməyə gəldikdə, Sıtinin fikrincə, bəzi yeni partiyaların və ya fraksiyaların Dumaya gedəcəyi təqdirdə belə, səlahiyyətlilərin ağlı olsaydı, ehtimal ki, müəyyən bir hissəsini ora buraxardı: “Prinsipcə heç bir köklü dəyişiklik ola bilməz. Bunun üçün bütün güc quruluşunu və siyasi sistemi dəyişdirmək lazım olardı, amma bunu necə edəcəyini başa düşəcək bir adamı tanımıram. Beləliklə, Duma Rusiyada olduğu kimi qalacaq - dünya üçün dekorativ bir qurum, insanlar üçün yararsız bir orqan və deputatlar üçün bir bəslənmə yuvası”.
Həmsöhbətimiz seçkilərin nəticələri ilə əlaqədar mümkün sosial etirazlar mövzusuna da toxunub: “Aksiyalar mümkün ola bilər, ancaq yalnız Moskvada və bəlkə də Sankt-Peterburqda müəyyən qədər böyüyə bilər. Yerli səviyyədə yalnız milli separatçı yönümlü çıxışlar maraqlı ola bilər, amma bunlar görünmür və ya gözlənilmir. Və Moskvada nə ola bilər? Yaxşı, tutaq ki, gənclər Tverskaya və Sadovoye küçələrində gəzişdilər və ya onları polis dağıtdı, ya da özləri dağıldılar - sonra nə? Qətiyyən heç nə! Yenə də payızdır – havalar soyuqlaşır və yağış yağır, evdə isə smartfonlar və istilik var. Odur ki, səlahiyyətlilərin dediyi kimi hər şey “ştat rejimi”ndədir”.
Geri qayıt