Lerikdə nə baş verir?
17-02-2021, 10:57
Son vaxtlar bəzi vəzifə sahibi olan şəxslər nəinki daşıdıqları vəzifələrindən “ikiəlli yapışırlar”, hətta onlar “minbir hoqqalar”a qol qoyub “əndazəni də aşırlar”. Belə bir səbəblər üzündəndir ki, yerlərdə əmələ gələn narazılıqlar həm “pik nöqtə”yə çatır, həm də sosial problemlər tüğyan etməkdə davam edir. Bütün bunların kökündə vəzifə sahibi olan həmin şəxslərin tələb olunan qanunlara əməl etməmələri, üzərinə düşən vəzifələrini yerinə yetirməyi bacarmamaları, yaxud da yerinə yetirmək istəməmələridir. Bu kimi halların varlığı da, ilk növbədə vətəndaşların dövlət qurumlarına olan inamsızlıqlarını artıran səbəblər olur. Açıq şəkildə qeyd edək ki, belə vəzifə sahiblərindən biri də Lerik rayon İcra Hakimiyyətinin başçısı cənab Rövşən Bağırovdur. Son iki-üç aydır ki, bu şəxsin qanunsuzluğa söykənən əməlləri haqda ölkənin ən aparıcı media qurumları silsilə tənqidi açıqlamalar yayımlayır, ictimaiyyəti narahat edən problemləri hər kəsin diqqətinə çatdırır. Bütün bunlara baxmayaraq, icra başçısı Rövşən Bağırov qeyd olunan tənqidlərdən nəticə çıxarmaq, çoxsaylı sosal problemləri həll etmək əvəzinə, bu gün də oxşar addımlarını atmaqda davam edir.
Redaksiyamza daxil olan məlumatlara görə, bu gün də Lerik RİH-nin başçısı daşıdığı vəzifəsindən sui-istifadə edir və o, ölkə rəhbəri cənab İlham Əliyevin sahibkarlığın inkişaf etdirilməsi yöndə verdiyi tapşırıqlara məhəl qoymur və rayon ərazisində sahibkarlıq fəaliyyəti ilə məşğul olan şəxslərdən bəzilərini “gözümçıxdıya salır”. Belə sahibkarlardan biri də Lənkəran şəhəri, Heydər Əliyev prospekti-153 ünvanında yaşayan İsmayılova Zərintac ismayıl qızıdır. Çünki, adı çəkilən bu xanım sahibkar Azərbaycan Resıpublikasının Prezidenti cənab İlham Əliyevə, Azərbaycan Respublikasının 1-ci Vitse-Prezidenti Mehriban xanım Əliyevaya, Baş Nazir cənab Əli Əsədova, Ekologiya və Təbii Sərvətlər naziri cənab Muxtar Babayevə, Daxili İşlər naziri cənab Vilayət Eyvazova, Kiçik və Orta Biznesiin İnkişafı Agentliyinin rəhbərliyinə və digər dövlət qurumlarına ünvanladığı şikayət ərizəsinin bir surətini Xeber Fakt.Az-ın redaksiyasına da təqdim edib. Zərintac İsmayılova təqdim etdiyi şikayət ərizəsində yazır: “Mən bir sahibkar olaraq hər zaman bu sahənin inkişaf etdirilməsinə bacardığım qədər önəm vermişəm. Buna əsas səbəb, cənab Prezidentin sahibkarlığın inkişafına verdiyi dəstək olub ki, bunu da hər zaman dəyərləndirmək lazımdır. Bildirirəm ki, 44 gün davam edən Vətən müharibəsində hər kəs öz fəaliyyəti ilə arxa cəbhədə dövlətimizə lazımi töhfəsini verdiyi bir vaxtda, Lerik rayonunda bir sahibkar olaraq nəinki bizə dəstək göstərildi, əksinə hər vasitə ilə bizi sıxışdırdılar, qurub-yaratmaq istədiklərimizi bilərəkdən məhv etdilər. Nəzərinizə çatdırım ki, uzun illərdir sahibkarlıq fəaliyyəti ilə məşğul oluram. Bundan əlavə, Lənkəran Rayon Qadın Sahibkarların İctimai Birliyinin sədri olmaqla bərabər, 20 ildən də artıqdır ki, “Dostluq” müəssisəsinin rəhbəriyəm. Rəhbərlik etdiyim müəssisə həm ixrac, həm də idxalla məşğuldur. Möhtərəm Prezident dəfələrlə sahibkarları qəbul edərkən həmin görüşlərdə mən də iştirak etmişəm, ölkə rəhbərimizin məsləhətlərindən sonra bölgəmizdə sahibkarlığı daha da inkişaf etdirməyə çalışmışam. Atdığım addımlar nəticəsində təqribən 100 nəfərə yaxın şəxs işlə təmin olunmuşdur ki, bu da 100 ailənin dolanışığının təmin edilməsi olub. Oğlum Quliyev Raqib Vaqif oğlu da sahibkarlıq fəaliyyəti ilə məşğul olur və o, 10 ilə yaxındır ki, Lerik rayonu ərazisində onun rəhbərlik etdiyi “Cənub Turizm İstirahət Mərkəzi” fəaliyyət göstərir. Raqib Quliyev fəaliyyətə başladığı ilk vaxtlardan Lerik rayon İcra Hakimiyyətinin başçısı Rövşən Bağırov həm onu, həm də onun etibarnamə ilə qanuni nümayəndəsi olaraq məni daim sıxışdırmış, istirahət mərkəzi üçün tikdirdiyimiz tikililəri heç bir əsas olmadan sökdürmüş, yalnız lazımi maraqları təmin olunduqdan sonra o, bizdən müəyyən müddət ərzində əl çəkmişdir.
Bir müddət bundan öncə ölkə rəhbərinin verdiyi tövsiyyələri əsas tutaraq meşə zonalarında aqrobağlar salmaq və əhalinin kənd təsərrüfatı məhsullarına olan ehtiyaclarını təmin etmək qərarına gəldik. Bu məqsədlə “Cənub Turizm İstirahət Mərkəzi”nə bitişik ərazidə, hansı ki, tamamilə istifadəsiz qalmış torpaq sahələrini aldıq ki, həmin ərazilərdə qoz və fındıq ağacları əkib becərək və ölkəmizin qoza, fındığa olan ehtiyaclarını təmin etməkdə yardımçı olaq. Bu məqsədlə Azərbaycan Ruspublikası Ekologiya və Təbii Sərvətlər Nazirliyi, Meşələrin İnkişafı Departamentinin Lənkəran regional meşə təsərrüfatı mərkəzinə müraciət etdik və adı çəkilən bu qurumla 15 yanvar 2020-ci il tarixdə 01 nömrəli müqavilə sənədini imzaladıq. İmzalanmış müqavilə sənədi əsasında 5 hektar torpaq sahəsini 15 illik müddətə, yəni 2035-ci ilə kimi icarəyə götürdük. Bununla bağlı oğlum Raqib Qulivevin adına Daşınmaz Əmlakın Dövlət Reyestrindən 20 iyul 2020-ci il tarixdə Çıxarış da verildi. Biz həmin torpaq sahəsini mal-qaradan qorumaq məqsədilə ərazini tikanlı məftillə çəpərə aldıq və az sonra Qax rayonundan 15.000 (on beş min) manat pul verib 7 (yeddi) min ədəd qoz, fındıq ağacları alıb gətirdik və həmin torpaq sahəsinə əkdik. Bunu bilən Lerik rayon İcra Hakimiyyətinin başçısı Rövşən Bağırov özünün əlaltısı olan bələdiyyə sədrini, hansı ki, həyat yoldaşı rəsmi sənədlər əsasında bələdiyyə sədri olsa da, onun vəzifəsini qeyri-qanuni icra edən Fərman Həşimovu, həmçinin kənd icra nümayəndəsi Elxan Aslanovu həmin sahəyə göndərdi. Bu şəxslər də kəndin bir neçə qadınlarını üstümüzə saldılar və həmin torpaq sahəsinin icra başçısına aid olduğunu, heç kimin Rövşən Bağırovun icazəsi olmadan hərəkət edə bilməyəcəyini bildirdilər. Biz həmin şəxslərə torpaq sahəsini qanuni yolla aldığımızı, cənab Prezidentin tövsiyyələrini əsas tutaraq kənd təsərrüfatı məhsullarına, o cüümlədən qoz və fındığa olan tələbatı ödəmək məqsədilə bolluq yaratmaq istədiyimizi bildirdik. Çox təəssüf hissi ilə qeyd edim ki, icra başçısı bizə dəstək vermək əvəzinə, birbaşa bizə maneəçilik yaratdı. Hətta, icra nümayəndəsi Elxan Aslanov gözləmədiyimiz halda fəhlələrin və digər şəxslərin yanında mənə “Sahibkarsan gözümüz aydın olsun” dedi. Bundan əlavə o, “Lerik rayonunun icra başçısı və prezldenti Rövşən Bağırovdur, bu şəxsin icazəsi olmadan heç kim bu ərazilərdə hansısa hərəkəti edə bilməz” deyir. Bütün bunlar azmış kimi, 13 noyabr 2020-ci il tarixdə icra başçısının, kənd icra nümayəndəsinin, bələdiyyə sədrinin “fitfası” ilə əraziyə gələn qadınlar minbir əzab-əziyyətlə ərsəyə gətirdiyimiz təqribən 3 min ədəd qoz və fındıx ağaclarını çıxarıb məhv etdilər, hətta onlar bununla kifayətlənməyib çıxarılmış ağacları üstüstə yığıb yandırdılar. Belə bir dözülməz vəziyyətlə bağlı həmin əraziyə dəvət etdiyimiz Lerik RPŞ-nin əməkdaşları real mənzərəni öz gözləri ilə gördülər və onlar gördüklərinin videoçəkilişini həyata keçirib lentə də aldılar. Qeyd edim ki, bizə qarşı törədilmiş belə bir cinayət əməli ilə bağlı hal-hazırda RPŞ-də təhqiqat araşdırmaları aparılmaqdadır. Bildirirəm ki, həmin vaxt bir qadın üstümə hücum çəkib təpiklə ayağımdan vuraraq mənə xəsarət yetirdi. Elə ki, o, həkim müayinəsindən keçib şikayət etdiyimi bildi, o halda mənə yalvararaq şəhid ailəsi olduğunu dilə gətirdi. Az sonra məlum oldu ki, həmin qadın məktəb direktorunun həyat yoldaşıdır və o, torpaqlarımızın bütövlüyü uğurunda canlarından keçmiş şəhidlərimizin adından sui-istifadə edir. Yəni, bu ailə şəhid ailəsi deyil, sadəcə olaraq həmin qadın düşdüyü vəziyyətdən xilas olmaq üçün, bu cür iyrənc əmələ qol qoyur.
Qeyd edim ki, baş verən belə bir biabırçılıqlardan sonra Lerik RPŞ-nə müraciət etdim və polis əməkdaşlarının nəzarəti altında qalan 4 min ədəd acağı əkdirə bildik. Ömründə bir ədəd olsun belə acağ əkməyən həmin şəxslərin, əkdiyimiz ağacları bundan sonra da çxarıb məhv edəcəklərindən ehtiyat etdiyimiz üçün, cənab Prezident başda olmaqla digər vəzifə sahiblərinə, həmçinin media qurumlarına müraciətlər etməyi özümüz üçün borc bildik.
P.S. Hörmətli oxucular! Bir mətbu qurum olaraq belə bir biabırçı olayı daim gündəmə gətirməyə və baş verən digər qanunsuzluqlarla bağlı, məhz hər kəsi bundan sonra da məlumatlandırmağa çalışacağıq.
Ardı var //deryaz.az//
Geri qayıt