Penitensiar sistemə nəzarət edən yoxdur?
10-08-2020, 09:44
“Oğlum dünyasını dəyişmiş əmisinə görə özünün cəza çəkdiyi cəzaçəkmə müəssisəsində halva ehsan etmək istəyib. Bunun qarşısını almaq istəyən nəzarətçi ilə mübahisəsi düşüb. Şərləyiblər, məhkəmə cəzasının 1 il 6 ayının qapalı cəzaçəkmə müəssisəsində çəkməsinə dair hökm çıxarıb. Bu, məhkum oğluma qarşı ədalətsizlikdir”. DİA.AZ bildirir ki, bunu Gəncənin Kəpəz rayonunda yaşayan 1-ci qrup əlil Sevinc Rzayeva deyir.
Sevinc Rzayevanın 30 yaşlı oğlu Rəsul Osanlı Cinayət Məcəlləsinin 29, 120.1 (qəsdən adam öldürməyə cəhd) maddəsi ilə 7 il 10 ay 15 gün müddətinə məhkum edilib, cəzasını 1 saylı Cəzaçəkmə Müəssisəsində çəkir. Ananın sözlərinə görə, Rəsul Osanlı cəzasının 3 ilini geridə qoyub. Hadisə bu ilin iyununda baş verib: “Cəzaçəkmə müəssisəsində dünyasını dəyişən məhbusa görə başqa məhbusların ehsan dağıtması həmişə olub, indi də var və burada qəbahət heç nə yoxdur. Ancaq bilmirəm nəyə görə nəzarətçi oğluma buna imkan verməyib, aralarında mübahisə yaranıb. Oğlum 3 ildir ki, həmin müəssisədə cəza çəkir, indiyədək heç bir nəzarətçi ilə işi olmayıb, əgər nəzarətçini söyən, döyən olsaydı, elə 3 ildə edərdi bunu... Deyirlər, nəzarətçini söyüb, adamı səbəb olmadan niyə söysünlər? Deməli, nəzarətçi bunu söyüb ki, bu da cavabını verib. Necə olur ki, nəzarətçilər gecə-gündüz dustaqla kobud davranır, söyür, döyür, buna görə heç birini cəzalandırmırlar, dustaq onu söyən nəzarətçi ilə onun öz dilində danışanda tez cəza kəsirlər?..”
Sevinc Rzayevanın sözlərinə görə, nəzarətçi müəssisənin rəhbərliyinə məhkumdan şikayət edib. Rəis də məsələni araşdırmadan iyunun 17-də məhkumu 15 günlük “kars”a salıb: “Bununla da ürəkləri soyumayıb, deyiblər, qapalı həbsxanada ölən əmisinə görə ehsan verən oğlan elə gedib həmin qapalı həbsxanada cəzasını çəksin. Oğlumun işi məhkəməyə göndərilib, nəzarətçini də üzünə qoyublar. Nəzarətçini təhqir etməsini bəhanə edərək oğlumun cəzasının 1 il 6 ayını qapalı həbsxanada keçirməsi ilə bağlı məhkəmə hökmü çıxarılıb. Oğlum da buna etiraz olaraq “kars”da aclığa başlayıb. Bunun qisasını almaq üçün 15 günlük “kars” bitən kimi ona daha 2 ay “kars” verilib və 1 saylı cəzaçəkmə müəssisəsinin “kars”ından 15 saylı cəzaçəkmə müəssisəsinin “kars”ına köçürülüb”.
Geri qayıt