Ziya Məmmədovun köhnə komandası dəmiryol sistemində hələ də gücünü qoruyur?
10-10-2016, 09:12
Bu yaxınlarda Qafqaznews.az saytında “Azərbaycan Dəmir Yolları” QSC-nin Qaradağ Dəmiryolu Stansiyasının rəisi Məhərrəm Məmmədov və onun Bakı Yük Stansiyasında polis məntəqəsinin rəisi olan oğlu Nadir Məmmədov barəsində bir neçə yazı dərc olunmuşdu. Həmin yazılarda Nadir Məmmədovun instagram profilindən götürülmüş videoçarxlardan söz açılırdı. Həmin videoçarxlarda Nadir Məmmədova məxsus “Gelandewagen” markalı avtomobilə aid görüntülər və hətta bu maşının nömrəsi (10 -RC-007) hallandırılan rep parçasına da rast gəlinirdi. Həmçinin, redaksiyamıza daxil olan məlumata görə, məntəqə ərazisində “Kölgəsiz adam” adlanan filmin çəkilişləri aparılmış, bu çəkilişlərdə sözügedən avtomobil də istifadə olunmuşdu. Rejissor Amil Adiloğlu, eləcə də Nadir Məmmədov və onun atası Məhərrəm Məmmədov bu və digər məlumatları təsdiqləmişdilər.
Sentyabrın 13-də isə Qafqaznews.az-ın redaksiyasına başqa maraqlı məlumatlar daxil oldu. Əvvəlcə bildirək ki, redaksiyamıza daxil olan məlumata görə, artıq Bakı Yük Stansiyasının Polis Məntəqəsində xidməti yoxlamalar başlayıb və Nadir Məmmədovun polis vəsiqəsi əlindən alınaraq, bir müddətlik vəzifəsindən kənarlaşdırılıb.
Həmçinin, bizim yazılardan sonra “Azərbaycan Dəmir Yolları” QSC-nin sədri Cavid Qurbanovun göstərişi ilə Qaradağ Dəmir Yol stansiyasına audit yoxlaması göndərildiyi haqda da redaksiyamıza məlumat daxil olub. Bu məlumatlarda DİN-in Nəqliyyatda Baş Polis İdarəsinin sabiq rəisi, hazırda Penitensiar Xidmətə rəhbərlik edən general-mayor Ceyhun Həsənovun, eyni zamanda polis çevrələrində ona yaxınlığı ilə tanınan, hətta Dəmiryolu Nəqliyyatında Polis İdarəsinin sabiq rəis müavini, hazırda isə Kürdəxanı İstintaq Təcridxanasında rəis müavini olan Yaşar Məhərrəmovun da adı hallanır. Vaxtilə Məhərrəm Məmmədovla dost olduğu deyilən, sonra Ceyhun Həsənovla yaxınlaşaraq, nəqliyyat polisində irəliləyən, hazırda isə Kürdəxanı İstintaq Təcridxanasında rəis müavini olan Y.Məhərrəmovun oğlunun Nadirlə dost olduğu, hətta videoçarxlarda onunla birgə çəkildiyi məlumatda qeyd olunurdu. Yaşar Məhərrəmovun özü isə bunu Qafqaznews.az-a təkzib etmiş, oğlunun 13 yaşında olduğunu bildirmişdi.
Oktyabrın 3-də Qafqaz Xəbər Agentliyinə vaxtilə Məhərrəm Məmmədovun yanında, Qaradağ Dəmiryolu Stansiyasında xəzinədar işləmiş Yaşar Yunis oğlu Nabatəliyev müraciət etdi. 2011-2014-cü illərdə stansiyada xəzinədar olduğunu deyən Y.Nabatəliyev bildirdi ki, 2 il əvvəl Məhərrəm Məmmədovun və onun Elmira xanım adlı müavinin ciddi saxtakarlıq və korrupsiya əməllərini ifşa edib.
“Məhərrəm Məmmədov məni sıxışdırırdı, iş prosesindən kənarda tuturdu və elə edirdi ki, ordan çıxıb gedim. Mən 14 il dəmiryolçu təcrübəsi olan adamam, Xarkovda oxumuşam… Haqsızlıqla barışa bilmirdim. Şübhəli məqamlar çox idi. Araşdırdım və sonda müəyyən etdim ki, onlar stansiyadan yük boşaldan və xidmətlərimizdən istifadə edən sahibkarları, ələlxüsus da dövləti aldadırlar.
Yük boşaldan sahibkara deyilirdi ki, 1500 manat verməlisən… Amma elə bir mexanizm qurmuşdular ki, üst çekdə 1500 manat yazılırdı, dövlət hesabatlarına düşən çeklərdə isə 300 manat. Beləcə, 1200 manat gedirdi Məhərrəm Məmmədovun cibinə. Bu halları aşkarlayanda mənə maneələr törətdilər. Mən gedib “Azərsu”nun törəmə şirkətlərindən bu çekləri topladım və müqayisə etdim. Onları sizə də təqdim edirəm, bir çekdəki məbləğ digəriylə üst-üstə düşmür. Mən bu məsələni qaldıranda dedilər kimə güvənirsən, dedim Allaha və Ali Baş Komandana. Amma Məhərrəm Məmmədovu bu işdə dəstəkləyənlər oldu.snimok Yükdaşıma Departamentinin müdiri Əşrəf Məmmədəliyev, hazırkı nazir müavini Arif Əsgərov, hazırda QSC-də sədr müavini olan Əlirza Süleymanov (akademik Nizami Süleymanovun qardaşı – red.) bu işi ört-bastır etdilər. Nəqliyyatda Baş Polis İdarəsində cinayət işi açıldı, istintaq getdi, mən də gedib ifadə vermişdim. Amma Ceyhun Həsənov bu işi bağladı. Heç kim cəzalandırılmadı”, – deyə Y.Nabatəliyev vurğuladı.
O, şikayətlərinin QSC rəhbərliyi tərəfindən araşdırılmadığını, əksinə özünün “cəzalandırıldığını” qeyd etdi: “Mən Maliyyə Xidmətinin rəisi Elşən Məmmədova ərizə ilə və çeklərin seriyalarını yazaraq, dəlilli-sübutlu müraciət etmişdim. Amma onlar guya saxta bir “müşavirə” keçiriblər, iddialarımı araşdırmadan belə, yalan olduğu barədə qərar veriblər. Elşən Məmmədov da Ziya Məmmədovun yaxın qohumudur. QSC-nin sədr müavini Əlirza Süleymanov atama dedi ki, bu işi mətbuata çıxarmasın, onun məsələsini həll edəcəyəm, narahat olmasın. Amma üç gün sonra əmrim verildi… Korrupsiyanı ifşa etdim deyə, məni “statya” ilə qovdular, karyeramı məhv etdilər”.
Y.Nabatəliyevin sözlərinə görə, Məhərrəm Məmmədov uzun müddət Konstitusiya Məhkəməsinin hakimi İsa Nəcəfovun adından istifadə edib: “Bir vəzifəli adamla dost olanda, hər yerdə ondan danışırdı. Axırda İsa Nəcəfov bunu danladı ki, adımı az hallandır. Sonra Məhərrəm Məmmədov Ziya Məmmədovun qaynı Şahin Bilalovla dostlaşdı, başladı onun adından istifadə etməyə. Eşitdiyimə görə, o da bundan xəbər tutmuş və Məhərrəm Məmmədovu sərt tənbeh eləmişdi. Məhərrəm Məmmədov həmişə problemlərini pul gücünə həll edir, özü də yaxşı sərvət toplayıb. NZS-də bir evi var ki, top vursan, dağıtmaz…O vaxt mənə deyirdi ki, Ziya Məmmədovla danışmışam, onun kurasiyasında olan rayonlardan birinə icra başçısı gedəcəyəm. Bunu təsdiq edən səs yazısı da var”.
Biz şikayətçinin təqdim etdiyi çeklərə baxdıq, eləcə də səs yazısını dinlədik. Həqiqətən də, məbləğlərdəki fərqi oxucuların özləri də görə bilərlər. Lakin təəssüflər olsun ki, həmin səs yazısında Məhərrəm Məmmədov tərəfindən bəzi qeyri-etik ifadələr işlədildiyinə görə, hələlik yayımlaya bilmərik. Lakin aidiyyatı olan qurumlara təqdim edə bilərik. Yaşar Nabatəliyevin sözlərinə münasibət almaq üçün, biz Məhərrənadirm Məmmədovun mobil nömrəsinə zəng etdik. Lakin 2 gün ərzində bu nömrəyə düşə bilmədik. Eləcə də, Qaradağ Dəmiryolu Stansiyasında zənglərimizə cavab verən olmadı. “Azərbaycan Dəmir Yolları” QSC-nin mətbuat xidmətinin rəhbəri Nadir Əzməmmədovla əlaqə saxladıqda isə, Yaşar Nabatəliyevin adını çəkən kimi, mətbuat katibi dərhal reaksiya verdi.
“Nabatəliyev yalan məlumatlar yayır. Onun sözlərinin heç bir əsası yoxdur. O yüz yerə gedib… Özü də işində nöqsana görə işdən qovulub”, – deyə N.Əzməmmədov bildirdi. “Onun hazırkı Cavid Qurbanov rəhbərliyi ilə bağlı bir iddiası yoxdur. Arif Əsgərovun vaxtında bu işin ört-bastır olduğunu deyir”,- deyə qeyd etdik. “Bilirəm, hər halda araşdırılıb, əsassızdır. Siz Əşrəf Məmmədəliyevlə əlaqə saxlayın”, – deyə mətbuat katibi tövsiyə etdi. Biz onun tövsiyəsinə əməl etdik, lakin Əşrəf Məmmədəliyevi iş otağında tapa bilmədik. Araşdırmamız davam edir…
Geri qayıt