Akif İslamzadə Ağdama köçür?

“Hər dəfə anamın doğum və anım günlərində məzarını ziyarət edib, dualar oxuyuruq. Düzdür, anam dəbdəbəni heç vaxt sevməyib. Yaxınlar, ailə üzvləri yığışardı və doğum gününü evdə qeyd edərdik. Anam səhnədə də peşəkar idi, evdə də, mətbəxdə də işinin peşəkarı idi. Ananın hazırladığı, bişirdiyi yeməyin dadını sizə heç kəs verə bilməz. Dünyanın ən yaxşı aşbazı da bunu sizə verə bilməz. Ananın əlinin öz məxsusi duzu var. Ananın bişirdiyi dadlı yeməyi sənə yad qızı da, başqa qadın da bişirə bilməz. İstəyirsən şah ol, istəyirsən dilənçi sənin bütün arzuların həyata keçmir. Anamın da həyata keçməyən arzuları var idi”

Bunu Moderator.az-a açıqlamasında görkəmli sənətkar Sara Qədimovanın oğlu müğənni Akif İslamzadə deyib. O daha sonra əlavə edib:

“Bir çoxları yazır ki, Sara xanım Ağdamda doğulub. Bu yalnış məlumatdır. Sara xanım Bakıda doğulub, anası da Fatmayı kəndindəndir. Bəli, anamın atası Ağdamın Abdal-Gülablı kəndində dünyaya göz açıb. Anam deyirdi ki, Ağdamda ata-baba yurdumuz var. Düzdür, mən Ağdamda olmamışam. Hazırda məlumatım yoxdur ki, o yurd qalıb ya yox?” deyə sənətkar bildirib.

Sənətkar efirlərə çıxmamağının səbəbindən də danışıb:

“Efirlərimizdə böyük problemlər var. Bu səbəbə görə də özümü orada görmürəm. Musiqimizin, incəsənətimizin problemləri qalıb kənarda, efirdə başqa mövzular müzakirə olunub. Ona görə də getmirəm və getmək istəmirəm də. Tamaşaçıları da artıq televiziyadan uzaq salıblar. Bu cür gedişat heç də xoş sonluqla nəticələnməyəcək” deyə sənətkar bildirib.