“Atam Moskvada oxumağa icazə vermirdi, 2 gün evə gəlmədim, parkda yatdım”
24-01-2024, 08:30
“O vaxt Bakıda yaşayan pərəstişkarlarım rusdillilər idi. Azərbaycan dilində “Ay gecikən məhəbbətim” mahnısını oxuyurdum. Azərbaycanlılar deyirdi ki, “rus dilində oxuma”, rus dillilər də deyirdilər ki, “Azərbaycan dilində oxuma”. Onlara deyirdim ki, musiqinin dili yoxdur. Musiqi sərhəd tanımır, bilmir. Hansı dildə oxuyursan-oxu yetər ki, ürəklə ifa edəsən. Mən konsertlərdə İspan, Rus, İtalyan, Fransız dillərində də oxuyuram. 1980-ci illərdə verdiyim konsertləri Azərbaycanda heç kim verməyib. Uzun müddət konsertlərim anşlaq keçirdi”
Bunu Moderator.az-a açıqlamasında xalq artisti Sərxan Sərxan deyib. O daha sonra uşaqlığı ilə bağlı bir məqamı xatırlayıb.
“Atam uşaqlıqda məni musiqi məktəbinə aparmışdı. Getmirdim, deyirdim ki, mən qız zadam bəyəm musiqi ilə məşğul olum?! 14 yaşım olanda fikrim dəyişdi. İstədim ki, taleyimi musiqi ilə bağlayım. Bu da necə baş vermişdi?! Böyük qardaşımın dostunda o vaxt gitara var idi. 1-2 ifa etdi, bəyəndim. Atama deyəndə ki, gitarada oxumaq istəyirəm, dedi ki, dəli olmusan?! Atam yazıçı, jurnalist idi. Deyirdi ki, təsəvvür et 40 yaşın var, elə bir məclisdəsən ki, hamıdan soruşurlar nə işlə məşğulsan, sən utanmayacaqsan ki, deyəsən gitarada ifa edirəm?! Küsüb evdən qaçdım. Atama dedim ki, Moskvada oxumağa buraxmasan evə qayıtmayacam. Birinci gecəni parkda yatdım. Anam çox pis oldu. 2 gün evə gəlmədim. Sonra atam dedi ki, “eybi yox, qoy getsin, imtahanda kəsərlər qayıdar”. Gecə-gündüz gitarada çalışırdım ki, Moskvada imtahanlara qəbul olum” deyə sənətkar bildirib.
Sənətkar bildirib ki, gənclərin musiqi ilə məşğul olması təqdirəlayiq haldır.
“Musiqi həmişə inkişaf edir. Bəlkə mən də gəncliyimdə narazılıq edib demişəm ki, qocalar nə oxuyur ki?! İndi də cavanlar oxuyurlar. Əcəb edib oxuyurlar. Mədəni, səbrli olsunlar. Mövzusu dolğun olan əsərlər oxusunlar. Musiqi cürbəcür olmalıdır. Musiqi özü seçəcək yaşayır yoxsa yaşamır. Düzgün musiqi deyilsə 1-2 ildən sonra yaddan da çıxacaq o mahnılar. Əgər yaxşı ifadırsa o qalacaq” deyə müğənni bildirib.
Xalq artisti “bozbaş” adlandırılan müğənnilərdən də danışıb.
“O vaxt indiki kimi deyildi ki, gedib hardasa çıxış edəsən. Konsert idarələri var idi. Sənin yalnız çıxış üçün 1-2 mahnıya icazən var idi. Vəssalam! Səhnədə 45 dəqiqə oxumaq üçün nazirlik sənə icazə verməli idi. Əgər səndə o sənəd yox idisə, heç kim səni səhnəyə buraxmırdı. Bu gün şərait dəyişib. Estrada müğənniləri nə istəyir edir, heç kimdən asılı deyillər. Bəzən deyirlər ki, “bozbaş oxuyanlar”. Bozbaş oxuyanların arasında da çox istedadlıları var. Sadəcə olaraq onların təhsili yoxdur. Yaxşı, bəs onlar necə yaşamalıdır?! Necə dolanmalıdır? Onlara həmin oxuduqları mahnılara görə pul verirlər. Onlar üçün imkan yaratsınlar, onlar da öz yaradıcılıqlarını ayrı istiqamətə verib, ayrı mahnılar, konsertlər oxusunlar. Onlar pula görə həmin mahnıları oxuyurlar. Sən ona şərait yarat, sonra qına. Bizim ixtiyarımız yoxdur onlara bozbaş deyək. Ailə saxlayırlar, qazanmalıdırlar. O vaxtlar da müğənnilər toylara gedirdi. Mənə deyirlər ki, “Sərxan müəllim niyə toylara getməmisiniz?”. Onların toydan qazandıqları pulu mən rəsmi yolla bir konsertdən qazanırdım. Mənə toy lazım idi? Əlbəttə ki, yox! Mən toy müğənnisi deyildim” deyə xalq artisti bildirib.
Geri qayıt