"Boşluğu doldurmaq üçün çəkildim, olmadı..."
26-12-2023, 09:07
“Çərçivələri heç vaxt sevməmişəm. Çalışmışam ki, sərbəst olum. Ümumiyyətlə aktyor sərbəst olmalıdır. Bu həm də mənim xasiyyətimə yansıyıb. Baş rolları və müsbət qəhrəmanları oynadığım üçün rejissorlar o illərdə bəzən mənə mənfi qəhrəman rolları verməkdən imtina edirdilər. Fikirləşiblər ki, əgər Nəsimini oynayıbsa, ona yalnız baş qəhrəmanları vermək lazımdır. Vallah mən bütün rollarımı əsas rol kimi oynamağa çalışmışam. Hətta epizodları da. Həmişə arzum olub ki, teatrda işləyim. Bu arzum həyata keçməyib. Əslində aktyor teatrda işləyib, vaxtı olanda filmlərə çəkilməlidir”
Bunu Moderator.az-a açıqlamasında xalq artisti Rasim Balayev deyib. O daha sonra əlavə edib.
“Biz bu gün əvvəlki dövrlərdəki kimi filmlər çəkə bilmirik. O illərdə kinostudiyanın boş qalan vaxtı olmayıb. Orada həyat qaynayırdı, prosses gedirdi. İndi tək-tük filmlər çəkilir. Amma tamaşaçılar yenə də onlardan narazıdır. Kino cəmiyyətdə baş verən müxtəlif hadisələrə ən tez münasibət bildirən sənət növüdür. Zəfər qazandıq, bizim qəhrəmanlarımız, igid övladlarımız var. Bu prosseslərə bir az gecikmişik. Amma sevindirici haldır ki, nazirlik bu istiqamətdə çox gözəl işlər görür. Bu sahədə çalışan insanlarda da inam yaranıb” deyə sənətkar bildirib.
Xalq artisti bir etiraf da edib.
“O illərdə həvəssiz çəkildiyim film olub. Təsəvvür edin, ildə 2-3 filmə çəkilən insan, birdən-birə işsiz qalır. Boşluğu doldurmaq üçün o filmdə çəkildim. Film peşəkar insanların əlində olmadığı üçün alınmadı. Bu gün də ssenarini oxumadan rola çəkilmirəm. Aktyorlar var ki, hər rolu qəbul edirlər. Şəxsən mən belə etmirəm” deyə aktyor bildirib.
Geri qayıt