“Həkim dedi ki, məsuliyyəti siz daşıyırsınız, yolda rəhmətə getsə...”
27-10-2022, 09:19
“Hüseyn təhsilini yarımçıq qoyub 1-ci Qarabağ müharibəsinə yollanmışdı. Əslində o qazi adlanırdı, amma o bu haqda danışmağı sevmirdi. Kimsə ona bu haqda sual verəndə deyirdi ki, bu mənim vətənə olan borcumdur. Bunu mən kiməsə demək üçün, hardansa nəsə istəmək üçün, harasa müraciət etmək üçün etməmişəm! Deyirdi ki, müharibəyə getsəm də şəhidlik zirvəsinə ucala bilmədim, amma nələrsə etmək istədim, etdim və geri döndüm”.
DİA.AZ bildirir ki, bunu Moderator.az-a açıqlamasında tanınmış prodüsser Sayqa Cahid yaxın dostu, mərhum repçi Hüseyn Dərya haqda danışarkən deyib. O, daha sonra bildirib.
“Ümumiyyətlə Hüseyn sıxıntılarını, problemlərini heç kimlə bölüşməzdi. Hər zaman yaxşı şeyləri biz dostları ilə bölüşərdi. Hüseyn həyatsevər bir insan idi, cəmiyyətin bəzi nümayəndələri onu elə bir vəziyyətə salmışdı. Bu adam bir dəqiqə bir yerdə oturmurdu, sürətlə hərəkət edirdi. Mən Hüseynin sənət dostu yox, həyat dostu idim. Onunla dərdləşirdim, həyatında bütün olanlardan xəbərdar idim. Mənimlə elə sirləri bölüşüb ki, özümlə o biri dünyaya aparacağam. Ölümündən bir neçə gün öncə biz onunla yeni mahnı, konsert, planlar hazırlayırdıq. Bir çoxu deyir ki, bu qəza yox, intihardır. Amma bu qəza idi. Yuxusuz idi, çox işləyirdi” deyə Hüseynin sənət dostu deyib.
Sayqa Cahid Hüseyn Dərya ilə son görüşünü də xatırlayıb.
“Bizə xəbər etdilər ki, tez gəlin, Hüseyn qəza törədib. Qaçaraq xəstəxanaya getdim. Öncə bizi içəri buraxmaq istəmədilər, daha sonra birtəhər içəri daxil ola bildim. Ona sistem qoşmuşdular. Yaxınlaşıb soruşdum ki, “necəsən?”. Başını qaldırıb dedi ki, “sən necəsən?”. Dedi ki, “həkimlərə de ki, içim yanır, sistemə nəsə başqa dərman qatsınlar”. Əyilib alnından öpəndə yenidən dedi ki, “mən yanıram”. Həkimlərə dedim ki, mən onu başqa xəstəxanaya aparmaq istəyirəm. Dedi ki, qol çəkin, götürün aparın. Yolda rəhmətə getsə, siz məsuliyyət daşıyırsınız. Ailəsindən, yaxınlarından da heç kim gəlməmişdi. Təkcə bacısının yoldaşı xəstəxanada idi. O da dedi ki, baxın görün neynirsiz?! Bu gün həqiqətən də səhnə Hüseynsiz qalıb, o mənim qardaşım idi. Biz 4 bacı olmuşuq, Hüseyn mənə qardaş olub. Deyirdi ki, mən öləndən sonra rep də olmayacaq” deyə o bildirib.
Geri qayıt