“Allah sənin insafını kəssin, bəzən dedi-qodulara görə səhərə qədər yatmamışam...”
24-10-2022, 09:09
“Oxuduğum mahnıların mövzusunun bəzilərini həyatda yaşamışam. Əgər onları yaşamasam məndə bu yaxşı alınmaz. O vaxt “Axtarma məni” mahnısı oxumuşdum. O illərdə həmin anları yaşayırdım. Bəlkə də bu bir mesaj, ismarış idi. Yəni “mən əvvəlki mən deyiləm, artıq dəyişilmişəm, axtarma məni” demək istəyirdim. Mən heç vaxt özüm üçün, öz həyatım üçün yaşamamışam. Sənətim üçün, balalarım, nəvələrim üçün yaşamışam. Bəzən efirlərə çox gec-gec çıxıram. O qədər zənglər gəlir, camaat məni həqiqətən də çox istəyir. Sonra özümü günahlandırıram ki, Mətanət, Allah sənin insafını kəssin, niyə gec-gec efirə çıxırsan? Gör sən nə qədər insanlara lazımsan”.
DİA.AZ xəbər verir ki, bunu Moderator.az-a açıqlamasında əməkdar artist Mətanət İsgəndərli deyib. O, daha sonra əlavə edib.
“Uğura zəhmətimlə, dişimlə dırnağımla çatmışam. Daim əzablı yollardan keçmişəm. Kiçik bir şeyi özümə dərd edənəm. Haqqımda nəsə bir dedi-qodu olanda günlərlə yatmamışam. Öz-özümə deyirəm ki, kaş bunlar məndə olmazdı. Heç vaxt maskalanmamışam. Bir gün deyib-gülməsəm elə bilərəm ki, nəsə itirmişəm. Bəzən xətrimə dəyən insanın xətrinə dəyə bilmirəm. Deyirəm ki, ay Allah, niyə onun cavabını vermədim? O axı mənim xətrimə dəydi! Bəzən deyirəm ki, sən kimsən ki, mənim xətrimə dəyirsən? Heç doğma anam hansısa səhvimi üzümə demir. Bilir ki, mən çox həssas insanam, o dəqiqə fikir edəcəyəm” deyə o bildirib.
Əməkdar artist bildirib ki, artıq çəkidən xilas olduğu üçün sevinir.
“Bir adama deyirsən ki, nə gözəlsən?!O da deyir ki, sənin gözlərin gözəldir. Həqiqətən də bu sözdə böyük məna var, elə-belə deyilmir. Elə insan var ki, gözəlliyi duymur. Halbuki hamı ona gözəl deyir. Demək ki, onun iç dünyası gözəl deyil. Qəlbi qaradır. Son günlər mənə də yaman bu sözlər deyilir. Onu da etiraf edim ki, özüm də görünüşümü bəyənirəm. Bilsəydim illərdir elə bu çəkidə qalardım. Çalışıram ki, yeməyimi vaxtı-vaxtında yeyim, artıq çəki almayım” deyə müğənni bildirib.
Geri qayıt