Vergi generalı Əmanətlərin Sığortalanması Fondunu necə idarə edir?
17-05-2019, 08:32
Sabiq vergi generalı, vaxtılə Vergilər Nazirliyində qurulmuş korrupsiya sxeminə rəhbərlik edən və “iş adamlarının qənimi” kimi ad çıxaran, vergilər nazirinin sabiq müşaviri, hazırda Əmanətlərin Sığortalanması Fondunun icraçı direktorunun müşaviri Habil Məmmədov fondda da köhnə əməllərini davam etdirir. Bu barədə istiqlal.az-a hökumətdəki mənbələrdən məlumat daxil olub.
Mənbənin məlumatına görə, Əmanətlərin Sığortalanması Fondunun rəhbərinin müşaviri vəzifəsinə təyinat alan H.Məmmədov artıq icraçı direktorandan artıq səlahiyyətlərə yiyələnib. “Vergi generalı” özü üçün ayrıca bina ayrılmasına nail olub, Vergilər Nazirliyində korrupsiya əməllərində ləkələnmiş və Mikayıl Cabbarov vergilər naziri təyin olunandan sonra işdən çıxarılan əməkdaşları öz başına toplayıb. H.Məmmədov bağlanılan bankların əmlaklarların satışı ilə məşğuldur. Bu əmlakları satıb, Fond bağlanan bankların əmanətçilərinin pullarını qaytarmalıdır, lakin H.Məmmədov burda da öz sxemini qurub. Belə ki, əmlaklar guya alıcı çatışmamazlığından ucuz qiymətə satılır. Əslində isə H.Məmmədov əmlakları bazar qiymətinə tanışlarına satır, lakin Fondun büdcəsinə bu pulun cuzi hissəsi daxil olur, qalan vəsait isə H.Məmmədovun cibinə axır.
Mənbənin bildirdiyinə görə, vergi generalının səlahiyyətləri yalnız aktivlərin satışı ilə bitmir – H.Məmmədovun əsas vəzifəsi bağlanmış banklar tərəfindən verilmiş kreditlərin yığımının artımını təmin etməkdir. Lakin bu işdə də o, Fondun manefələrinə qulluq etmir. Belə ki, son aylarda kredit yığımı kəskin aşağı düşüb – ötən ilə nisbətən bağlanmış bankların müştərilərindən kredit yığımı 3 dəfəyədək azalıb. Halbuki H.Məmmədovun Fonda göndərilməsində əsas məqsəd onun təçrübəsindən istifadə edərək kredit yığımını artırmaq idi. Görünür bu işdə də H.Məmmədov öz maraqlarını güdür və qeyri-rəsmi “ödənişlər” hesabına kredit borcu olanlara müəyyən güzəştlər edir.
"Nəticədə, vətəndaşların əmanətlərinin ödənilməsinə yönəldilməli olan vəsait H.Məmmədovun "büdcəsinə" axır, vətəndaşlar isə narazı halda siyasi rəhbərliyə üz tutur. Halbuki onların pulunu ödəmək üçün imkanlar var. Fəaliyyətinin yarıtmaz olduğunu ört-basdır etmək üçün isə H.Məmmədov tez-tez bağlanmış bankların əməkdaşları arasında yerdəyişmələr edir ki, günahı adi işçilərin üzərinə atsın. Bundan başqa, vətəndaşların müraciətlərinin cavablandırılması gecikdirilir, H.Məmmədovun imzası ilə gedən cavab məktublarında mahiyyətdən kənar ümumi cümlələr coxluq təşkil edir. Bununla H.Məmmədov sadə insanları “yola verməyə” çalışır. Bəzi hallarda isə vətəndaşlara hətta rəsmi məktublarda hədə-qorxu gəlməkdən də çəkinmir. Görünən odur ki, Vergilər Nazirliyində korrupsiyalaşmış sistemi üçün faydalı kadr olan H.Məmmədov “təmiz” işləyə bilir və istənilən sahədə yalnız öz mənafeyini düşünür"- deyə mənbə vurğulayıb.
Geri qayıt