Mikayıl Cabbarov Fazil Məmmədovun "Rza Zərrab"larını ifşa edə biləcəkmi?
29-12-2017, 09:27
Yeni ildən bizi sayılı günlər ayırır.Yola saldığımız il bir çox məqamlarıyla yadda qaldı və mətbuat üçün ən yaddaqalan hadisələrin sıralamasında şübhəsiz ki, Fazil Məmmədovun Vergilər Nazirliyindəki 17 illik “imperator”luğunun sona yetməsi ilk yerlərdən birini tutur. Çünki vergi təkcə ölkə iqtisadiyyatının qan-damar sistemi hesab olunmur, eyni zamanda məmləkət insanının “məmə” deyənindən pəpə yeyəninədək hər kəsin həyatında və güzəranında ölçüyəgəlməz önəm kəsb etdiyindən burada baş verən təlatümlərin hər kəsə dəxli var. Bu baxımdan yola salmaqda olduğumuz ilin son ayında mediada Fazil Məmmədovla başlanan xəbərlərin, şərh və proqnozların dominantlıq təşkil etməsi təbiidir. Eyni zamanda əslində bütün bunların ictimai təftişinin həyata keçirilməsi, baş verənlərin saf-çürük edilərək ictimaiyyətin yaşananlara adekvat olaraq operativ məlumatlandırılması media cameəsinin funksiyalarından və mənəvi borcundan biridir. Çünki ölkə prezidenti qələm əhlini məmnun edən və siyasi leksikonumza daxil etdiyimiz bir ifadəsi ilə ilə damğasını vurub və bizləri özünün köməkçiləri elan edib. Odur ki, prezidentin köməkçiləri olaraq cəmiyyətin informasiya ehtiyyaclarını ödəməkdə sorumluyuq.
Təbii ki, “Fazil Məmmədov niyə işdən kənarlaşdırıldı” sualına cavab axtarmaq yersiz olar. Çünki onun görəvindən alınması üçün səbəblər və əsaslar o qədər idi ki, sadalamağa dəyməz. Amma “niyə məhz indi vəzifədən qovuldu” sualına cavab axtarmağın var. Məsələ burasındadır ki, məhz Fazil Məmmədovun özünəməxsus idarəetmə sistemi və qurduğu rüşvət piramidası yola salmaqda olduğumuz ildə doyma həddinə çatdı və onun bu aqibətlə üzləşməsi gözlənilən oldu. Ölkə sahibkarlığı ağır duruma salındı, işsizlik tüğyan etməyə başladı, Etirazlar və fəryadlar artıq gedib dövlət başçısına çatdı və prezident İlham Əliyev müşavirələrin birində Vegilər Nazirliyini sərt tənqid etsə də Fazil Məmmədov nəinki heç bir nəticə çıxarmadı, əksinə, vəziyyəti daha da mürəkkəbləşdirdi.
İndi yeni nazirə korrupsiya yuvasına çevrilmiş Vergilər Nazirliyindən ağır miras qalıb. O bu sistemdə 17 il ərzində qurulmuş rüşvət və korrupsiya şəbəkəsini darmadağın etmək üçün aylarını verməyə məcbur olacaq. Təbii ki, Mikayıl Cabbarov bunu bacaracaqmı və bu qurumda kök atmış şəbəkəni tamamilə təmizləyə biləcəkmi sualı da aktualdır və cəmiyyət dörd gözlə oradakı total təmizləmə əməliyyatına nə zaman strat veriləcəyini gözləyir. Özü də buradakı təmizləmə əməliyyatı elə aparılmalıdır ki, kimsə kiminsə adamı olduğuna görə sivişib sudan quru çıxa bilməsin. Çünki Fazil Məmmədovun idarəetmə sistemi elə qurulub ki, orada rüşvət və korrupsiya mərəzinə yoluxmamaq sadəcə mümkün deyil və bütün bu neqativlərə rezistentlik göstərərək bu şəbəkənin bir elementi olmaqdan imtina etmək ləyaqətinə sahib səlahiyyət sahibləri barmaqla sayılacaq qədər olar.
Mikayıl Cabbarovun durumunu qəlizləşdirən bir amil də məhz Fazil Məmmədovun anormal vergi idarəetməsinin qanunvercilik bazasını obrazlı desək yenidən söküb yığmaq zorunda qalması, eyni zamanda yarıtmaz vergi idarəçiliyi ucbatından ölkənin zədələnmiş beynəlxalq imicini bərpa etməkdir. Etiraf edilməlidir ki, son illər üzləşdiyi vergi cəhənnəminə görə ölkəni minlərlə xarici şirkət və iş adamı tərk etmək məcburiyyətində qalıb. Bu azmış kimi 2014-cü ilin fevral və 2015-ci milin dekabr devalvasiyalarının ardından ölkənin bank sistemini cənginə almış xaosda da Vergilər Nazirliyi rəhbərliyinin özünəməxsus payı var. İndi Mikayıl Cabbarovun islahatçı komandası təkcə Vergilər Nazirliyində deyil, ölkənin bank sektorunda yaşanan böhranın da baiskarlarını ifşa etməyə məhkumdur. Çünki Məhz Vergilər Nazirliyi ilə Maliyyə Bazarlarına Nəzarət Palatasın ideyası olan nağd pul kütləsinə anormal nəzarət edilməsi, yəni bir dəfəyə şirkətlərin öz bank hesablarından 30 min manatdan artıq pul çıxarmasının qadağan edilməsi sahibkarlığının qəbirqazanı rolunu oynadı, nəticədə ölkədə belə bir xoşagəlməz mənzərə ilə üz-üzə qaldıq. İndi Mikayıl Cabbarov yerli və xarici şirkətlərə, iş adamlarına hansı metodlarla “vergi cənnəti” və ya “vergi cəhənnəmi” yaradıldığının anatomiyasını öyrənərək vəziyyətə müdaxilə etmək zorundadır. O Fazil Məmmədovun korrupsiyaya qurşanmış komandasının və digər qurumlardakı müttəfiqlərinin törətdikləri əməllərin miqyasını faktlarla, sübutlarla ortaya qoymaq üçün xeyli çaba xərcləməli olacaq. Təbii ki, bu zaman o ciddi müqavimətlə üzləşəcək, bəlli qüvvələr onun bu sistemdəki çirkabı təmizləməsinə mane olacaqlar, ən azı prosesi ləngitmək üçün çeşidli təxribatlara əl atılacaq. Amma bəri başdan media və prezidentin köməkçiləri olaraq yeni nazirə aparacağı islahatlarda birmənalı dəstəkçi olacağımıza zəmanət veririk və təxribatçıları ifşa etmək üçün ayaqdayıq. Çünki yuxarıda da qeyd edildiyi kimi bu, ümummilli məsələdir və baş verənlərin hər birimizə dəxli var. Çünki bu gün vergi sisteminin çirkabdan təmizlənərək saflaşdırılması milli təhlükəsizlik məsələsi qədər önəmlidir və iqtisadiyyatımızın alaq otlarından təmizləyərək adını qızıl hərflərlə müasir Azərbaycanın iqtisadiyyatnın xilaskarı kimi yazdırmaq üçün Mikayıll Cabbarova tarixi fürsət verilib. Ümid edək ki, o bu tarixi missiyanı uğurla həyata keçirəcək və onun islahatçı obrazına bəslənən ümidi doğruldacaq.
Sonda hörmətli nazirin diqqətinə bir məqamı çatdırmaq istərdik. Unutmaq olmaz ki, qardaş Türkiyə bu gün Rza Zərrab kimi bir “iş adamı”nın əsirinə çevrilib. Təbii ki, burada “Sem dayı”nın saman altdan su yeritməsi və bu yolla Türkiyəni ram etmək niyyəti appaçıq görünür. Amma o da etiraf olunmalıdır ki, çoxpilləli korrupsiya fakt ortadadır və Rza Zərrab zamanında Türkiyədə onun üçün yaradılmış vergi cənnəti səbəbindən əlindəki çirkli milyardların hesabına ölkənin bank sistemini çirkaba bulaşdırmağı bacarıb. Yəni tək bir Rza Zərrab olayı bu gün Türkiyə üçün FETÖ qədər baş ağrısına və əsəb gərginliyinə səbəb olub. Azərbaycanda da Rza Zərrablar az deyil və əllərindəki rəsmi kapital o qədər olmasa da Azərbaycanı beynəlxalq miqyasda rüsvay etməyə yetəcək səviyyədədir. Ona görə də Mikayıl Cabbarov günahkarları tezliklə axtarıb ifşa etmək istəyirsə ilk növbədə ölkənin bank sistemində yaşananların monitorinqini həyata keçirməlidir. O zaman aydın olacaq ki, hansı banklar niyə çökdürüldü, hansı banklar çirkli pulların yuyulmasında dominantlıq edib, hansı banklar minlərlə sahibkarın qəbirqazanına çevrildiyi hansı məmurlara yaxın şirkətlər üçün vergi cənnəti yaradıb. Obrazlı ifadə edilsə, banklar ölkə iqtisadiyyatının başına necə oyun açıldığını təfsilatıyla öyrənmək üçün ultrasəs müayinəsi və ya rentgen aparatı rolunu oynayır. Yəni məhz banklarda son illər ərzində həyata keçirilən əməliyyatları monitorinq edərək kimin kim olduğunu ortaya qoymaq olar.
Mövzunu davam etdirəcəyik və növbəti yazımızda Fazil Məmmədovun "Rza Zərrab"larının bir qisminin gözqamaşdırıcı bioqrafiyalarının bəzi ilginc məqamlarını oxucuların diqqətinə çatdırcağıq. Eyni zamanda Maliyyə Bazarlarına Nəzarət Palatasının Vergilər Nazirliyi ilə əl-ələ verərək bank sistemini niyə bu günə saldıqlarına da faktlarla aydınlıq gətirməyə çalışacağıq. Bizi izləyin... \\moderator.az\\
Geri qayıt