““Royal Estate” şirkəti mənə 43 min manat ziyan vurub”
8-06-2017, 08:59
“Təzadlar” qəzetinə müraciət edən Masallı rayonunun Çayqıraq kəndində qeydiyyatda olan, Bakı şəhəri, Yasamal rayonu, M.Fətəli küçəsi, ev 111-də kirayədə yaşayan Xalıq Nurullayev “Royal Estate” şirkətinin işçisi Fərhad Hüseynov tərəfindən haqsızlığa məruz qaldığını və 43 min manat ziyana düşdüyünü bildirib.
Bu barədə X.Nurullayevin Baş prokuror Z.Qaralova ünvanladığı müraciətində daha geniş bəhs olunur.
Müraciətdə deyilir:
“Hörmətli cənab Baş prokuror!
Mən 2010-cu ildən “28 May” metrostansiyasının yaxınlığındakı yeraltı keçiddə ticarətlə məşğul olurdum. Belə ki, “Royal Estate” şirkətindən müqavilə ilə yerlər götürən Fərhad Şaban oğlu Hüseynov 52 nömrəli mağazada mənə şifahi razılaşma əsasında 34 kvadrat metrlik yer icarəyə vermişdi. O, məndən ayda 5300 manat icarə haqqı alırdı, şirkətə isə 1500 manat verirdi. Eşitdiyimə görə, şirkət də həmin puldan vergi orqanlarına yalnız 400 manat ödəyirmiş. Devalvasiyadan sonra vəziyyətimiz çətinləşdi. Bu səbəbdən də bir neçə ticarətçi yığışaraq şirkət rəhbərliyindən və onların icarədarlarından kirayələri azaltmağı xahiş etdik.
Fərhad Hüseynov mənə dedi ki, icarə haqqı 1000 manat azalacaq, amma əvvəlcədən ona 20 min manat “şapka” verməliyəm. Lakin mən imtina etdim və şirkətin icraçı direktoru Anar Novruzovdan dəfələrlə xahiş etdim ki, mənə kömək etsinlər. Anar Novruzov məsələni həll edəcəyinə söz versə də, sözünə əməl etmədi. Hətta bir müddətdən sonra o, dedi ki, Fərhad Hüseynovla müqaviləni pozur və mən də həmin mağazadan çıxmalıyam. Lakin sonra öyrəndim ki, onlar əlbir olub, mənim qadın ayaqqabıları satdığım 34 kvadrat metrlik yeri Fərhad Hüseynovun anasının adına icarə müqaviləsi bağlaylblar.
Ötən il fevralın 20-də gəlib gördüm ki, mağazanı boşaldıblar və mənim 43 min manatlıq malım yoxdur. Bu barədə polisə məlumat verdim, 22-ci polis bölməsindən gəldilər, lakin dedilər ki, bu mülki məsələdir. Ancaq may ayında xəbər tutdum ki, mallarım “Royal Estate”in anbarındadır. Gedib gördüm ki, malların hamısı yararsız vəziyyətdədir. Mallarımı üç ay gizlədən “Royal Estate” şirkəti mənə 43 min manat ziyan vurub, indi isə həmin ziyanı ödəyən yoxdur.
Hörmətli cənab Baş prokuror!
Qeyd etdiyim kimi, mağazalardan yüksək məbləğdə icarə həqqı yığılsa da, icarə müqavilələrində aşağı məbləğ göstərilir. Mağazaları icarəyə götürənlər başqa şəxslər olsa da, tamamilə ayrı şəxslər işlədir və ticarətçilərlə heç bir əmək müqaviləsi bağlanmır. Bu cür vəziyyət yüzlərlə mağazalarda mövcuddur. Həmin ticarət obyektlərindən yığılaraq dövlət büdcəsinə ödənilməli olan icarə haqları başqa-başqa şəxslərin cibinə dolur.
Hesab edirəm ki, sözügedən ticarət öbyektlərində baş alıb gedən bu qanunsuzluqların aradan qaldırılması bəzi şəxslər tərəfindən mənimsənilən pulların dövlətin büdcəsinə ödənilməsinə şərait yaradar.
Vergiləri vaxtında və tam həcmdə ödəmək hər bir kəsin vəzifəsi olsa da, qeyd edilən ticarət obyektlərində bu konstitusion vəzifələrə laqeyd yanaşılır. Respublikanın müəyyən iqtisadi çətinliklərlə üzləşdiyi bir vaxtda bu şəxslər qanunsuz əməlləri ilə dövlətin büdcə siyasətini daha da ağırlaşdırır, eyni zamanda sadə işçilərin əmək hüquqlarını kobud şəkildə pozurlar.
Cənab Baş prokuror!
“28 May” metrostansiyasının yaxınlığındakı yeraltı keçiddə “Royal Estate” MMC-yə məxsus ticarət obyektlərini icarəyə götürən və əmək müqaviləsi bağlamadan işçiləri işə cəlb edən şəxslərin fəaliyyətinin yoxlanılaraq barələrində qanuni tədbirlər görülməsini sizdən xahiş edirəm.
Cənab Baş prokuror!
6 il ərzində Fərhad Hüseynova 5 min 300 manat pul ödəmişəm. Bu pul şirkətin adı ilə məndən alınıb. Həmin pulları Anar Novruzova verdiyini desə də, o, bunu təkzib edir. Ona görə də Fərhad Hüseynovun dələduzluq yolu ilə məndən aldığı 5 min 300 manat pulun və mallarımın özümə qaytarılmasına kömək edəsiniz.
Hazırda heç bir yerdə işləmirəm. Borc içində boğuluram. Mənə kömək edin, yalnız ümidim sizədir”.
Məsələ ilə bağlı qarşı tərəfin də mövqeyini dərc etməyə hazırıq.
Geri qayıt