«MTN-nin Kadrlar İdarəsinin rəisi Əlimusa Əliyev niyə həbs olunmadı???»
30-04-2016, 10:20
MTN-nin sabiq əməkdaşlarından Prezident İlham Əliyevə sensasiyalı müraciət…
(2-ci yazı)
«Təzadlar»a vaxtilə MTN-də çalışmış, lakin özlərinin qeyd etdikləri kimi, Eldar Mahmudov və ətrafının MTN-ni «OBXSS» üsul-idarəsinə çevirmələri sayəsində mövcud biabırçı vəziyyətə dözməyərək işdən gedən «çekist»lərdən müraciət daxil olmuşdur… Dünən həmin şikayətçilərdən ikisi redaksiyamızda oldu və cənab Prezident İlham Əliyevə ünvanlı müraciətlərini təqdim etdilər. Lakin «KİV haqqında» Qanunun tələblərini nəzərə alaraq hələki adlarının ictimailəşməsini istəmədiklərini bildirdilər…
***
Beləliklə, Prezident İlham Əliyevə və DTX-nin rəisi Mədət Quliyevə ünvanlı müraciəti ixtisarla təqdim edirik:
«Çox hörmətli Cənab Prezident!
Hörmətli cənab rəis!
Cənab Prezident!
…Onu da bildiririk ki, MTN-də baş verən bütün bu biabırçı hərəkətlərdən, dövlət təhlükəsizliyimizin qarantı olan bir qurumun rüşvətxorluq və bəzi hallarda iş adamlarının və sahibkarların qorxudulması aparatına çevrilməsindən nazir Eldar Mahmudovun birbaşa xəbəri var idi və deməli, elə özü də bunu idarə edirdi. Amma baş verənləri icra edən şəbəkə üzvləri olan, yuxarıda adlarını çəkdiyimiz, həmçinin aşağı vəzifədə olduqlarından hələki (onların sayı heç də az deyil) adlarını çəkmədiklərimiz bir çoxları var ki, dilə gətirilməsi mümkün olmayan korrupsiya şəbəkəsi yaratmışdılar…
MTN generalı Əlimusa Əliyev niyə həbs edilmədi?
Müraciətdə daha sonra deyilir:
«Cənab Prezident! Onu da xatırladırıq ki, MTN-də məlum korrupsiya şəbəkəsinin mərkəzi Baş Kadrlar İdarəsi idi. İdarənin rəisi isə Əlimusa Əliyevin bu ilin aprelin 23-də işdən çıxarılması xəbərini aldıq. Lakin hamı gözləyirdi ki, Əlimusa Əliyev həbs ediləcək. Uzun müddət keçmiş Milli Təhlükəsizlik Nazirliyinin (MTN) Kadrlar Baş İdarəsinin rəisi vəzifəsində işləmiş general-mayor Əlimusa Əliyev nazir Eldar Mahmudovun ən sevimli adamlarından idi. Onun bütün kadr məsələlərini o həll edirdi. Hansı ki, MTN-nin Kadrlar İdarəsinin vəzifəsi həm də kadrların seçilib yerləşdirilməsindən əlavə, onların sonrakı fəaliyyətlərinə də nəzarət etməli, təkmilləşmələrini təmin etməli idi. Amma sabiq nazir Namiq Abbasovdan sonra bu idarə nəinki kadrların düzgün seçilməsini təmin etdi, əksinə, bütün yeni kadrlar tanışlıq, rüşvət hesabına komplektləşdirildi. Elə Eldar Mahmudovun işdən çıxarılmasından sonra sərəncama verilən, yaxud həbs edilən kadrların əməllərinə diqqət yetirilsə, hər şey aydın olacaq. Əlimusa Əliyev və onun müavini, Kadrlar İdarəsinin pul aparatı və rüşvət açarı hesab edilən Tehran Babatov MTN əməkdaşlarının yüksək dövlət mükafatlarına təqdim edilməsində, general rütbələrinin verilməsində, ayrı-ayrı dövlət orqanlarında, nazirlik və universitetlərdə (xüsusi məsələlər üzrə prorektor vəzifəsi) məsul vəzifə tutmaqda da mühüm rol oynayırdılar. Məsələn, onların əsas vəzifəsi həm də barəsində şikayət edilənlərin dosyelərini, müsbət işlərini və s. şəxsi işinə əlavə etməklə nazirə məruzə etmək, gələcəkdə vəzifələrə irəli çəkilmə məsələlərində bunların rolunu nəzərə almaq idi. Lakin Əlimusa Əliyev və Tehran Babatov nəinki belə edirdi, barəsində ciddi nöqsanlar olanların adlarını külli miqdarda rüşvət sayəsində təltifə təqdim edirdilər. Budur, Cənab prezident, Sizə bir siyahı təqdim edirik. Biz sadə əmkdaşlar, yəni öz vəzifəsi ilə məşğul olanlar gecəmizi gündüzümüzə qataraq dövlətimizin təhlükəsizliyi yolunda qan-tər tökdüyümüz, transmilli cinayətkarlıqla mübarizə apardığımız bir şəraitdə, bir də görürdük ki, demək olar heç bir xidməti olmayanlar Prezident sərəncamı ilə yüksək adlara layiq görüldülər. Belə bir hadisə 2007-ci ilin 27 mart tarixində baş verdi və Milli Təhlükəsizlik Nazirliyinin bir qrup əməkdaşı dövlət mükafatları ilə təltif olundular. Sərəncama əsasən, milli təhlükəsizlik nazirinin müavini Əli Şəfiyev, Milli Təhlükəsizlik Nazirliyinin Hərbi Əks-kəşfiyyat Baş İdarəsinin rəisi Nizami Şirinov (onun barəsində az sonra bəzi faktları, həmçinin 1997-ci ildə vəzifəsindən nə üstündə kənarlaşdırılmasını bildirəcəyik) və Milli Təhlükəsizlik Nazirliyinin Hərbi Əks-kəşfiyyat Baş İdarəsi rəisinin müavini Hafiz Musayevə general-mayor hərbi rütbəsi verildi. Həmçinin MTN-nin bir qrup əməkdaşı isə orden və medallarla təltif olundular. Təsəvvür edirsinizmi, sərəncamın priampula hissəsində yazılırdı: «Azərbaycan Respublikasının milli təhlükəsizliyinin təmin edilməsində, xarici xüsusi xidmət orqanlarının kəşfiyyat fəaliyyətinin aşkarlanması və qarşısının alınmasında, beynəlxalq terrorçuluqla və transmilli mütəşəkkil cinayətkarlıqla mübarizədə yüksək peşəkarlıq göstərdiklərinə, xidməti vəzifələrinin yerinə yetirilməsində fərqləndiklərinə görə general-mayor Əlimusa Əliyev, polkovnik Sübahir Qurbanov "Vətənə xidmətə görə" ordeninin üçüncü dərəcəsi ilə, Allahquliyev Vüqar, Əsədov Hilal, Əsədullayev Ədalət, Əzizov Eldar, Nurməmmədov Malik, Ömərov Elxan, Tağıyev Ramiz, Usubov Mütəllim "Vətən uğrunda" medalı ilə, Ağayev Həsənağa, Əliyev Əli, Fətullayev İdrət, Məhərrəmov Bəbəş "İgidliyə görə" medalı ilə, Abbasov Asif, Axundov Vaqif, Bağırov Fariz, Çovdarov Akif, Əliyev Rafət, Əfəndiyev Namiq, Gərayzadə Ayaz, Hüseynov Rəşad, Kərimov Kərim, Quliyev Teymur, Mahmudov Elşad, Mikayılov Şahsuvar, Muradov Tengiz, Novruzov İlqar, Səlimov Azər, Şirəliyev Qədir "Hərbi xidmətlərə görə" medalı ilə təltif olunsunlar».
Yəqinki bu siyahıda kimlərin adlarının olduğunu və həqiqətdə bu yüksək ada kimlərin nə dərəcədə layiq olduğunu MTN-də çalışan hər kəs yaxşı bilirdi. Qoy qiyməti Tanrı versin və kimlərin Əlimusa Əliyevə və Tehran Babaşova bu siyahıya düşmək üçün hansı məbləğdə pul verdiklərini özləri desinlər… Amma həmin siyahıda biz həm də üstündən 8 il keçəndən sonra olmazın cinayətlər törətmiş digər yüksək çinlilərin- Akif Çovdarovun, Hilal Əsədovun, neçə gün əvvəl işdən qovulmuş Əlimusa Əliyevin özünün, Vüqar Allahquliyevin (MTN-nin Zıgdakı hərbi hissəsinin rəisi, 36 yaşlı general general-mayor)… adlarını görəndə yer-göy niyə titrəməməlidir??? Hansı ki, bu siyahını elə Əlimusa Əliyev tutmuş, nazir Eldar Mahmudova təqdim etmişdi.
Ən təəccüblüsü budur ki, bir müddətdir ki, Əlimusa Əliyev və Tehran Babatov mətbuatda özlərini həbs olunmuşlar kimi təqdim edirdilər. Lakin bu heç də belə deyil. Onlar da özlərini ictimai diqqətdən, mətbuatın gündəmindən kənarda saxlamaq üçün bu çirkin yola əl ataraq həbs edildikləri barədə yalan məlumat yaymışdılar. Bunların hamısı vaxtilə Namiq Abbasovun, MTN-nin birinci müavini olmuş mərhum Tofiq Babayevin ayağının altını qazanlar idilər. Nəticə bu oldu ki, indi vaxtilə dövlətimizi təhlükədə qoyaraq özlərinin gələcək təhlükəsizliyinin təminatı olan rüşvət pulları yığırdılar, özlərinə Azərbaycanın müxtəlif bölgələrində, həmçinin Bakıda iaşə obyektləri, istirahət mərkəzləri, mülklər, torpaq sahələri, digər qazanclı yerlər ələ keçirirdilər. Yəqinki yeri gəldikcə onların hər birinin çirkli pullar sayəsində aldıqları obyektlərinin siyahısını təqdim edə biləcəyik, həmin obyektlər dövlət nəfinə müsadirə edilməlidir. Çünki MTN-də, təkrar edirik, kadr məsələləri ilə bağlı əsas rüşvətlər Əlimusa Əliyev və onun müavini Tehran Babatov tərəfindən alınırdı. Onlar əməkdaşlardan MTN-nin özünə, həmçinin Bakı qarnizonuna «perevod» olunarkən 40-50 min manat, Bakı qarnizonundan digər rayon şöbələrinə «perevod» olunarkən isə 15-25 min manat pul alırdılar.
-General Əlimusa Əliyev və onun müavini Tehran Babatov MTN-də korrupsiya şəbəkəsini kadr işində necə qurmuşdu?
-Nizami Şirinov 1997-ci ildə MTN-dəki məsul vəzifəsindən niyə qovulmuşdu və 2005-ci ildə MTN-nin Hərbi Əks-Kəşfiyyat İdarəsinə necə rəis təyin edildi???
-MTN-nin 1-ci idarəsinin rəisi Elcan Abdullayev hərbi hissələrə MTN-nin kurator rəislərini hansı məbləğə təyin edirmiş?
(Ardı var)
«Təzadlar»ın Araşdırma Qrupu
P.S.Müraciətdə adları çəkilənlərin hər birini dinləməyə hazırıq, hətta özümüz KİV olaraq bunda maraqlıyıq. Lakin təəssüflər olsun ki, bəzilərinin mobil telefonlarını əldə edib zəng vursaq da mövqe bildirməkdən çəkinirlər… Bəziləri isə telefon zənginə cavab vermirlər.
Geri qayıt