YAP QURULTAYA HAZIRLAŞIR
26-09-2011, 16:17
QURULTAY PREZİDENT SEÇKİLƏRİ ÖNCƏSİ OLACAQ
Hakim Yeni Azərbaycan Partiyasının (YAP) rayon və şəhər təşkilatları hesabat-seçki konfranslarının keçirilməsi üçün hazırlıqlara başlayıb.
APA-nın məlumatına görə, rayon və şəhər təşkilatları hesabat-seçki konfranslarına hazırlıqlar YAP-ın Nizamnaməsinə uyğun olaraq keçirilir.
YAP-ın sentyabrın 24-də keçirilmiş rayon və şəhər təşkilatları sədrlərinin ümumrespublika müşavirəsində YAP İcra katibinin müavini Siyavuş Novruzov çıxış edərək partiyanın rayon və şəhər təşkilatlarının hesabat-seçki konfranslarının keçirilməsi ilə bağlı hazırlanmış təlimata uyğun tövsiyələri yığıncaq iştirakçılarının nəzərinə çatdırıb.
APA-nın əldə etdiyi məlumata görə, rayon və şəhər təşkilatlarının hesabat-seçki konfransları həm də YAP-ın növbəti qurultayına hazırlıqla bağlıdır. Belə ki, partiyanın növbəti - V qurultayının 2013-cü ildə keçirilməsi nəzərdə tutulur.
Qeyd edək ki, YAP-ın IV qurultayı 2008-ci il avqustun 2-də keçirilib. Həmin qurultayda İlham Əliyev yekdilliklə partiyanın sədri seçilib. Həmçinin, qurultay növbəti prezident seçkilərində (15 oktyabr 2008-ci ildə) YAP sədri İlham Əliyevin namizəd kimi irəli sürülməsini yekdilliklə qərara alıb.
Geri qayıt