FIRILDAQÇI ŞİRKƏT XALQ ARTİSTİNİN QOHUMUNUNDUR
16-09-2011, 16:47
"ƏLƏSGƏROĞLU-K" MMC VƏTƏNDAŞIN PULUNU MƏNİMSƏYİB
Son vaxtlar yeni yaşayış binaları ilə bağlı qalmaqalların sayı artmaqdadır. "Gen" MMC-nnin işi məhkəmə səviyyəsinə qədər yüksəlməsinə baxmayaraq yenə də bəzi şirkətlər vətəndaşlara problem yaratmaqda davam edir. Bəzi işbazlar, saxtakarlar və dələduzların fırıldaq hərəkətləri və işləri ilə insanların qəpik-qəpik topladığı pulları mənimsəyərək onların sabaha inamımızı öldürür. Redaksiyamıza müraciət edən Bakı şəhəri, Nəsimi rayonu, 20 yanvar küçəsi ev 19b, mənzil 87-də yaşayan İsmayılzadə Çingiz Alı oğlu da eyni problemlə qarşılaşıb.
Ç.İsmayılzadə 2007-ci ilin aprelayında oğlu üçün yeni tikilən yaşayışbinasından ev almaq istəyir. Bunun üçün direktoru Kazım Kazımzadə olan, "Ələsgəroğlu-K" MMC-yə (Ünvan: Xətai rayonu, Məhəmməd Hadi küçəsi 63) müraciət edir. Adı çəkilən şirkət Yeni Yasamal, Z,Bünyadzadə küçəsində ilk ödənişi 20 faiz olmaqla, 40 ayda ödəmək şərti ilə vətəndaşlara mənzillər təklif edir və Çingiz bəy həmin MMC ilə oğlum Əli İsmaylzadənin adına 10\9.04.2007-ci il tarixdə 48.400 AZN dəyərində 116 saylı müqavilə imzalayır. 20 faiz ilk ödəniş kimi 9680 AZN firmanın kassasına ödənir. Müqavilənin şərtlərinə görə, 40 ay ərzində hər ay 968 AZN ödənir və İsmayılzadə ailəsinə ödəniş qəbzi verilir. Bir sözlə Ç.İsmayılzadə "alıcı" kimi müqavilənin şərtlərini tam ödəyir. Lakin təxminən 2008-ci ilin aprelində aydın oldu ki, "Ələsgəroğlu-K" MMC göstərilən ünvanda heç bir bina tikmir. Bundan narahat olan Çingiz bəy direktor K.Kazımzadəyə müraciət edir və ondan "siz narahat olmayın, hər ay ödəmənizi edin, mən sizi Yasamalda başqa mənzillə təmin edəcəm" - cavabını alır. 2010-cu ilin yanvarında artıq ilkin ödənişlə birlikdə İsmayılzadə ailəsi 30 ayın ödəməsini etmiş olur, cəmi 38 min 720 manat. Bundan sonra məlum olmayan səbəbdən 30 aylıq ödəniş qəbzləri geri alınır və ilk ödəniş 38 min 720 manakt göstərməklə ilkin müqavilənin tarixi saxlanılmaqla yeni müqavilə tərtib olunur və bu müqavilədə qalan məbləğin 10 ay ərzində ödənilməsi göstərilir. Müqavilənin şərtlərinə əməl edərək, İsmayılzadə 2010-cu ilin 31 iyul tarixində 40 aydın 39 ayın pulunu ödəyir və K.Kazımzadəyə bildirirlər ki, 40-cı ayın ödənişini "Siz bizə açarları təmir üçün verəndə" ödəyəcəyik. Kazımzadə isə öz növbəsində onlara 2011-ci ilin mart ayına qədər narahat olmamağı tövsiyyə edir.
Kazımzadənin söz verdiyi tarix tamam olduqda məlum olur ki, heç bir ev tikilmir. Buna görə də İsmayılzadə müqavilənin bütün şərtlərini pozduğuna görə "Ələsgəroğlu-K" MMC-dən pullarını tələb edir. Bu zaman K.Kazımzadə verir ki, 50 min manata yaxın pulu 5 ayın ərzində, ayda 10 min manat qaytarmaqla ödəyəcək. İlk ay o dediyinə əməl etsə də sonrakı aylar vətəndaşa heç bir pul ödnəlmir. Əksinə Kazım Kazımzadə növbəti yalana əl ataraq 25 mart 2011-ci ildə Ç.İSmayılzadəni Bakı şəhəri, Nəsimi rayonu, 20 yanvar küç, 3169-cu məhəllədə yerləşən "Halal-A" adlanan Mənzil Tikinti Kooperativinin direktoru Kamal müəllimlə görüşdürür. "Halal-A" MKT-dan 2 otaqlı mənzil almaq üçün K.Kazımzadə Kamal müəllimə 10 (on) min manat pul verdi və söz verdi ki, hər ay on min manat ödəyəcək və sonda, yəni iyul 2011-ci ildə İsmayılzadə ailəsi mənzillə təmin olunacaq. Lakin "Ələsgəroğlu-K" firmasının direktoru "Halal-A" kooperativinə heç bir manat da ödəmir. May 2011-ci ildə "Halal-A" kooperativin direktoru Kamal müəllim beh kimi qəbul etdiyi on min manatı İsmayılzadəyə qaytarır.
İndi "Ələsgəroğlu-K" firmasının direktoru vətəndaşın telefon zənglərinə cavab vermir, gizlənir. Buna görə də Ç.İsmayılzadə hüquq mühafizə orqanlarına müraciət etməli olur. Belə olan halda K.Kazımzadənin müavini və bacanağı Etibar adlanan şəxs telefonla Ç.İsmayılzadəyə bildirir ki, "sən polisə şikayət etmisən, indii biz pulu sənə, yoxsa polisə verək." Maraqlıdır ki, hüquq mühafizə orqanları da baş vermiş hadisə ilə bağlı hər hansı tədbir görmürlər.
Onu da bildirək ki, Çingiz İsmayılzadə bizimlə söhbətində Kazım Kazımzadənin xalq artisti Aygün Kazımovanın yaxın qohumu olduğunu bildirdi. Təəssüf ki, Kazım müəllimlə əlaqə saxlamaq cəhdlərimiz heç bir nəticə vermədi. Gələn sayımızda qalmaqalın digər detalları ilə sizləri tanış edəcəyik.
Geri qayıt