Ermənistanın gərginliyi artırması nə ilə
24-09-2024, 17:01
Xəbər verdiyimiz kimi, Azərbaycan Prezidenti İlham Əliyev VII çağırış Milli Məclisin ilk iclasındakı çıxışı zamanı növbəti dəfə Ermənistan və onu silahlandıranlara xəbərdarlıq edib:
"Ermənistan silah üçün nəzərdə tutulan Sülh Fondundan istifadə edir, Fransadan pulsuz silah alır. Ona görə bu, ciddi məsələdir".
Azərbaycanın şərtlərinin yerində qaldığını xatırladan dövlətimizin başçısı qeyd edib:
“Ermənistanı silahlandıranlar bilməlidirlər ki, bütün gələcək hadisələrə görə birbaşa onlar cavabdehlik daşıyacaqlar. Təbii olaraq bizə qarşı rəsmi ərazi iddialarına son qoyulmalıdır. Onların Konstitusiyasına dəyişiklik edilməlidir, Minsk Qrupu da ləğv olunmalıdır”.
Beləliklə, Azərbaycan Prezidenti növbəti dəfə Ermənistan və onu silahlandıranlara xəbərdarlıq edib.
Aydın məsələdir ki, işğalçılıq siyasəti yürüdən Ermənistanın silahlandırılması onu yenidən təcavüzkarlıq kursunu davam etdirməyə sövq edə bilər. Belədə ABŞ, Fransa kimi ölkələrin Ermənistana münasibətdə tutduğu mövqe onu göstərir ki, Qərb də İrəvanın gərginliyi artırmasında maraqlıdır.
Bu proseslər fonunda regionumuzu nə gözləyir?
Mövzu ilə bağlı Bizim.Media-ya açıqlamasında Milli Məclisin deputatı Hikmət Babaoğlu bildirir ki, Azərbaycan Prezidenti VII Milli Məclisin açılış iclasında bir sıra mühüm məsələlərə toxunaraq, milli vəzifələrimiz sırasında ilk növbədə ölkəmizin hərbi təhlükəsizlik məsələsini önə çəkdi:
“Bu da səbəbsiz deyil. Çünki müharibənin 4 ildir başa çatmasına baxmayaraq, hələ də Ermənistanla Azərbaycan arasında sülh əldə olunmayıb. Bu isə o deməkdir ki, hələ də Ermənistanla müharibə vəziyyətindəyik”.
Deputat qeyd edir ki, Ermənistanın son dövrdəki davranışı, sürətlə silahlandırılması Azərbaycana öz təhlükəsizlik tədbirlərini artırmağı diktə edir:
“Hansı ki, bu da Azərbaycan Prezidentinin parlamentdəki nitqində öz əksini tapdı. Yaşadığımız dünya hazırda müharibələr mərhələsindən keçməkdədir. Azərbaycan da müharibə mərhələsini yenicə keçib. Əslində Azərbaycan Prezidenti təhlükəsizlikdən danışarkən hələ də ölkəmizin yaratdığı reallıqların bəzi ölkələr tərəfindən qəbul edilməməsi məsələsinə toxunub. Bu da Azərbaycanın suverenliyinə şübhə ilə baxan ölkələri müharibəyə motivasiya edən səbəb və beynəlxalq hüququ qəbul etmədiklərinin göstəricisidir. Belə olanda isə hüquqsuzluq və təzyiq nəticə etibarı ilə gərginliyi daha da artırır”.
“Azərbaycanın yeganə yolu hərbi gücünü artırmaqdır”
H. Babaoğlu hesab edir ki, Azərbaycan Prezidenti təhlükəsizlik məsələsini həm hərbi-sənayenin yaradılması, həm də dünya silah bazarında ölkəmizin gələcəkdə müəyyən mövqe tutması kontekstində önə sürüb:
“Dövlət başçısı bunu həm hərbi sənayenin inkişafı, həm də iqtisadiyyata dividend gətirən mühüm faktor kimi qeyd etdi. Çünki hərbi və siyasi güc mütləq iqtisadi güclə tamamlanmalıdır. Ona gör də regionun hazırkı gərgin vəziyyətində Azərbaycanın yeganə yolu hərbi gücünü artırmaq və təhlükəsizliyi təmin etməkdir. Azərbaycan Prezidenti də bir nömrəli vəzifə kimi bunları müəyyənləşdirdi”.
Geri qayıt