Ölkə təhsilinin inkişafına növbəti töhfə
23-09-2024, 08:44
Prezident İlham Əliyevin Sərəncamına əsasən, Azərbaycan tarixində ilk
dəfə olaraq, 20 sentyabr Dövlət Suverenliyi Günü kimi təsis edildi. Bu
əlamətdar günün qeyd edilməsi xüsusi önəm daşıyır. Bu gün ordumuzun
göstərdiyi şücaət, qəhrəmanlıq və vətən sevgisi nəticəsində nail olduğumuz
qələbə tarixidir. Belə ki, 2023-cü il 19-20 sentyabr tarixində ordumuzun
başlatdığı antiterror əməliyyatları uğurla nəticələnmiş və Azərbaycan
Respublikasının suverenliyi tamamilə bərpa edilmişdir.
Prezident İlham Əliyevin məhz 20 sentyabr tarixində doğma Qarabağa,
Xankəndi, Ağdam şəhərinə səfəri və bu səfər nəticəsində bir sıra açılışlar
etməsi, mühüm məkanların yenidən bərpası üçün təməlqoyma
mərasimlərində iştirakı bir daha göstərdi ki, Qarabağın əsl sahibi onu
yenidən dirçəldən, qurub-yaradan Azərbaycan dövləti və Azərbaycan xalqıdır.
Xüsusilə qeyd etmək istərdim ki, vaxtilə terrorçuların yuvasına çevrilmiş
Xankəndi şəhərinə dövlət başçımızın səfəri nəinki Ermənistana, bütün
dünyaya göstərdi ki, bura qədim Azərbaycan torpaqlarıdır.
Beləliklə, Prezident İlham Əliyev Xankəndi şəhərində Qarabağ
Universitetinin də açılışını etmiş oldu. Məhz Qarabğın təhsil mərkəzinə
çevrilməsi əsas hədəflərdən biridir. Qısa müddət ərzində universitetin yeni
tədris ilinə hazır olması, uzun müddət sonra ilk tələbələrini qəbul etməsi
ölkəmizin öz sərvətlərinə daim diqqətlə yanaşdığının sübutudur. Belə ki,
Prezident Qarabağ Universitetinin açılışı zamanı müəllim-tələbə kollektivi ilə
də görüşmüş, onlarla fikirlərini bölüşmüş və hələ də ölkəmizə qarşı ədalətsiz
fəaliyyətləri davam etdirənlərə qarşı həqiqəti və öz qəti mövqeyini bəyan
etmişdir.
Prezident İlham Əliyev çıxışı zamanı Dövlət Suverenliyi Gününün təsis
edilməsi, Azərbaycan ordusunun qəhrəmanlığını diqqətə çatdırdı: “İlk
növbədə, sizi və bütün Azərbaycan xalqını Dövlət Suverenliyi Günü
münasibətilə ürəkdən təbrik etmək istəyirəm. Bu günü biz birlikdə Xankəndidə
qeyd edirik və əminəm ki, 20 Sentyabr bundan sonra Azərbaycanda geniş
qeyd ediləcək. Düz bir il bundan əvvəl qəhrəman Azərbaycan Ordusu dövlət
suverenliyini tam bərpa etmişdir. Bir gündən az davam edən antiterror
əməliyyatı nəticəsində separatçıların kökü kəsildi, Azərbaycan öz dövlət
suverenliyini tam təmin etdi, beynəlxalq hüquq zəfər çaldı və Azərbaycan öz
gücünü bir daha göstərdi. Bu günü bizə bəxş edən qəhrəman hərbçilərimizi
hər zaman böyük minnətdarlıqla yad edirik. Vətən uğrunda canlarından keçən
şəhidlərimizin əziz xatirəsini daim qəlbimizdə saxlayırıq və saxlayacağıq.
Allah bütün şəhidlərimizə rəhmət eləsin. Vətən müharibəsi və antiterror
əməliyyatı keçirilərkən bizim 3200-dən çox qəhrəman şəhidimiz şəhadət
zirvəsinə ucalmışdır. Onların və digər qəhrəman hərbçilərimizin rəşadəti və
vətənpərvərliyi Qələbənin əsas amilləridir. Vətən uğrunda İkinci Qarabağ
müharibəsində 90 mindən çox gənc azərbaycanlı iştirak etmişdir”.
Bəli, 30 il keçməsinə baxmayaraq xalqımız işğalda olan torpaqlarını
unutmadı, əksinə, onu işğaldan azad etmək, suverenliyimizi bərpa etmək
üçün hər gün daha çox gücləndi, daha çox çalışdı. Torpaqlarımızı azad edən
gənclərimiz vətən sevgisi ilə, vətənpərvərlik hissi ilə böyüdüldülər. Həmin
gənclər vətənimizin ən çətin anında canlarından, doğmalarından keçərək,
addım-addım bələd olmadığları, çətin relyefli Qarabağ torpağını işğaldan
azad etməyə müvəffəq oldular. Bu qələbəyə sadəcə 44 gün ərzində nail
olduq. Qısa müddət ərzində belə bir nailiyyət əldə edilməsi həm də xalqımızın
kiçikdən - böyüyə ordumuza hər yolla dəstək olması, birlik olmasıdır. Digər bir
səbəb də, təbii ki, Ali Baş Komandan, Prezident İlham Əliyevin hərb və siyasi
müstəvidəki fəaliyyətləri, uğurları, qəbul etdiyi qərarlar, yürütdüyü uğurlu daxili
və xarici siyasətin nəticəsidir. Beləliklə, bu qələbə Ordu, Xalq və Ali baş
komandan birliyinin uğurlu nəticəsidir. 44 günlük Vətən Müharibəsi və
antiterror əməliyyatları Azərbaycanın gücünü, qüdrətini dünyaya göstərmiş
oldu. Bu gün bu şanlı qələbə dünya tərəfindən öyrənilir və öyrədilir.
Biz torpaqlarımızı işğal edən Ermənistan və onun havadarlarını
unutmamalıyıq. Hər zaman vətən sevgisi, vətənpərvərlik yaşamalıdır.
Prezidentin dediyi kimi, “Mən bu gün bizim müəllimlərimizi, onların işini
xüsusilə qeyd etmək istəyirəm. Çünki bizim gənclərimizin vətənpərvərlik
ruhunda tərbiyə olunmasında onların çox böyük rolu olmuşdur, bu gün də var.
İki tərbiyə mənbəyi var - ailə və müəllim. Xoşbəxtlikdən Azərbaycanda ailə
dəyərləri üstün tutulur və həmişə belə olmalıdır. Bizim ənənələrimiz bunu
diktə edir və eyni zamanda, bəzi Qərb ölkələrində ailə dəyərlərinin tamamilə
eybəcər formasına düşməsi hər birimizdə haqlı olaraq ikrah hissi doğurur.
Ona görə ailə dəyərləri, ailə tərbiyəsi birinci növbədə qorunmalıdır. Yenə də
deyirəm, müəllimlər uşaqların, gənclərin biliklərini artırmaq, eyni zamanda,
onların vətənpərvərlik ruhunda tərbiyəsi üçün fəal və səmərəli işləyirlər. İkinci
Qarabağ müharibəsi bunu göstərdi. Heç vaxt Qarabağı görməyən gənclər
Qarabağ uğrunda ölümə gedirdilər, ölümə getməyə hazır idilər, şəhid oldular,
yaralandılar. Ancaq yenə də bu Zəfəri təmin etmək üçün dayanmadılar”.
Bu gün Qarabağda sürətli şəkildə bərpa-quruculuq işləri həyata keçirilir.
Artıq çox sayda məcburi köçkünlər öz yurdlarına qayıtmış və bu davamlı
şəkildə həyata keçirilir. Elə cə də yeni yaradılan Qarabağ Universiteti də bu
işlərin bir hissəsidir.
Prezident İlham Əliyev: “Bu gün, eyni zamanda, Qarabağ Universitetinin
açılışıdır. Bu açılış istənilən gündə ola bilərdi. Amma hesab etdim ki, 20
sentyabrda olsa, daha düzgün olar. Çünki bu, artıq şanlı tariximizdir. Hesab
edirəm ki, Qarabağ Universitetinin yaradılması tarixi hadisədir və keçən ilin
noyabrında müvafiq Sərəncam imzalandı. Sonra mən buraya baş çəkdim.
Artıq mənim buraya üçüncü gəlişimdir və bütün göstərişlər verildi, Elm və
Təhsil Nazirliyi tezliklə bütün lazımi tədbirləri gördü. Demək olar ki, bina
yenidən quruldu”.
Prezident Ilham Əliyev Qarabağın tarixini bir daha hər kəsin diqqətinə
çatdırdı: Bura bizim tarixi torpağımızdır və əminəm ki, bunu Azərbaycanda
bilməyən yoxdur, dünyada da bunu bilirlər ki, Xankəndi şəhəri qədim
Azərbaycan yaşayış yeri olubdur, onun adı onu göstərir - Xanın kəndi.
Sadəcə olaraq, yenə də Azərbaycana, xalqımıza qarşı düşmənçilik siyasəti
nəticəsində uzun illər ərzində bizim nəzarətimiz burada ya zəif idi, ya da
ümumiyyətlə, yox idi. Çünki XIX əsrin əvvəlində bağlanmış üç müqavilə -
“Kürəkçay”, “Gülüstan”, “Türkmənçay” müqavilələri faktiki olaraq sonrakı
işğalı da şərtləndird.
XX əsrin əvvəlində isə xalqımıza qarşı növbəti düşmənçilik addımları
atılmışdır. 1923-cü ildə heç bir əsas olmadan Azərbaycanda, Qarabağda
“Dağlıq Qarabağ Muxtar Vilayəti” yaradılmışdı, sovet Azərbaycanı
Respublikasının tərkibində idi. Məhz bu müqavilələrdən sonra heç vaxt
Qarabağ torpağında yaşamayan ermənilər kütləvi surətdə İrandan və Şərqi
Anadoludan buraya köçürülmüşdür və bu, həqiqətdir, bu, dəqiq tarixdir”.
Beləliklə, belə bir vaxtda Ümummilli lider Heydər Əliyev hakimiyyətə gəlişi ilə
erməni terrorçularının qarşısın aldı. Azərbaycan müstəqilliyini əldə etdi.
Bu gün artıq uzun müddətdən sonra erməni işğalçıları torpaqlarımızdan
qovuldu, separatçılar, terrorçular artıq torpaqlarımızın bir qarışında da
mövcud deyillər. Uzun illər sonra torpaqlarımızın hər qarışında Azərbaycan
bayrağı dalğalanır, Azərbaycan əsgəri gəzir. Bu gün Azərbaycan tamamilə
suveren, güclü, yenilməz, qüdrətli orduya malik dövlətdir.
Gülər Baxışova
Pedaqogika üzrə fəlsəfə doktoru
Dia-az.İnfo
Geri qayıt