“Geyimdəyişmə otaqlarında xanımların kamerada görüntülənməsinə qətiyyən imkan vermək olmaz”
9-09-2024, 16:46
“Bakıda və Azərbaycanın digər böyük ticarət mərkəzlərində fəaliyyət göstərən paltar mağazalarının geyimdəyişmə otaqlarına kamera qoyulmasını birmənalı şəkildə pisləyirəm. Əvvəla, bu, insanların hüquqlarını məhdudlaşdırır. İnsan onu kamerada görmələrini istəmirsə, hüququdur və bu hüququ qəsb etmək olmaz. İkincisi, mənəvi hallar mövcuddur. Xüsusilə, geyimdəyişmə otaqlarında xanımların kamerada görüntülənməsinə qətiyyən imkan vermək olmaz. Həm hüquqi, həm də adət-ənənə baxımından doğru deyil”.
Bu sözləri Pravda.az-a açıqlamasında VI çağırış Milli Məclisin deputatı, Vəhdət Patiyasının sədri Tahir Kərimli deyib.
“Həmin mağazalar belə əsaslandırırlar ki, guya bəzi oğurluq halları olur. Oğurluğun qarşısını almağın başqa yolları da var. Mağazalara aparatlar qoyulur, paltar oğurlanırsa, qapıdan çıxarkən siqnal səsi eşidilir. Ümumiyyətlə, heç bir halda haqq, bəraət qazandırılası məsələ deyil. Belədirsə, kameraları geyimdəyişmə otağından xaricə qoymaq olar, ən azından müştəri girib-çıxanda görünsün, nəzarət edilsin. Bu necə əsaslandırmadır ki, “onsuz da şəhərdə hamı açıq-saçıq gəzir?” Əvvəla, hamı açıq-saçıq gəzmir, gəzməyənlər də var. Abırlı-həyalı xanımlarımız da çoxdur. Kamera qoyulması barədə bunu əsas gətirərək deyirlər ki, “çöldə abırsız gəzirlərsə, nədən qorxurlar?” Qətiyyətlə pisləyirəm, mağazalarda geyimdəyişmə otaqlarına kamera qoyulmasının qarşısı alınmalıdır”.
Qeyd: Sosial şəbəkələrdə “Nyu Yorker”, “Koton” kimi mağazaların geyimdəyişmə otaqlarına kamera qoyulması ciddi müzakirə yaradıb. Həmin mağazalar çoxlarının tənqid hədəfinə tuş gəlsə də, müsbət addım kimi dəyərləndirənlər də olub.
Geri qayıt