“Gözləyib, gözləyib, gəlib Məhərrəm ayında deyirlər ki, toy edirəm...”
2-07-2024, 13:06
“Artıq neçə illərdir, Məhərrəm ayında toy etmək məsələsi hər dəfə müzakirə olunur. Əsrlərdir, bizim cəmiyyətimiz xüsusilə həssas günlərdə, dini matəm günlərində şənlik etmir. Bu, cəmiyyət, xalq olaraq ümumi mədəniyyətimiz, inancımız, yanaşma tərzimizdir, dinə olan sevgimizdən qaynaqlanan səbəbdir. Şadlıq evləri ilə əlaqə saxlayan insanlar sonunda ilahiyyatçı kimi bizə də gəlib çıxırlar ki, hacı, Məhərrəm ayı nə vaxt başlayır? Bir gün gec və ya tez olduğunu soruşurlar ki, toyu məhz Məhərrəm ayında etməsinlər. Bu, 99% belədir. Reallıq budur. Yerdə qalan 1% nəyəsə, hansısa fikrinə, inancına görə əməl etmirsə, şəxsi işidir. Kim Məhərrəm ayında toy edirsə, ona ancaq məsləhət görə bilərik ki, illərdir, heç kim bu ayda toy etməyib. Tövsiyə edirəm ki, şənlik, toy üçün daha pozitiv, maraqlı günlər seçsinlər. Tələm-tələsik iki ayın içində “yox, biz toy etməliyik” deyirlər, mən bunu o qədər də zəruri bilməzdim. El arasında bu hüznlü, həssas günləri “ağır günlər” adlandırmışıq. Bu, Peyğəmbərimizin ailə faciəsidir. Bizim də ümumxalq hüzn günlərimiz var və həmin günlərdə şənlik etmirik, hörmətlə anırıq. Bu, çox gözəl mənəvi tendensiya, ümummilli mədəniyyətdir”.
Bu sözləri Pravda.az-a açıqlamasında ilahiyyatçı Təyyar Hüseynli deyib.
“Vətən müharibəsindən sonra Azərbaycanda toy şənliklərində belə bir mədəniyyət yaranıb ki, birinci şəhidlərin xatirəsini sükutla yad edirik. Artıq hər toyda, şənlikdə şəhidlərimizi anırıq. Harada haqsız-ədalətsiz insan qətlinə, faciəsinə yol açıblarsa, ümumbəşəri insani dəyərlərə görə buna etiraz edirik ki, dünyada sülh, əmi-amanlıq olsun. Məhərrəm ayında da belə hadisə baş verib. Məhəmməd Peyğəmbər və onun ailəsinə qarşı amansız qətliam törədilib. Böyüklərdən belə görmüşük ki, həmin günləri hüzn günü kimi keçirək. Toy etsinlər. Mənim qadağamla nəsə olan deyil, toy edən öz qərarında olacaq. Mən İslam dininə görə bunu məsələhət bilmirəm. İnsan gərək özünə rəva bilmədiyini başqalarına da rəva bilməsin, arzulamasın. Mən övladıma toy etmək istəsəm, pozitiv, şən günlər seçərəm. Məsələn, Zəfər Günü, dini, milli bayram günləri... Gözləyib, gözləyib, gəlib Məhərrəm ayında deyirlər ki, toy edirəm. Məsələhət bilməzdim...” - o qeyd edib.
Geri qayıt