“Aktyor teatrdan çıxandan sonra məhv olur, səhnədə dünyadan getməlidir”
29-06-2024, 11:28
“Aktyor səhnə üçün doğulub, səhnədə də dünyadan getməlidir. Əslinə qalsa, yaşlı aktyorların daha çox təcrübəsi olur, onlar da gənclərə dayaq olmalıdırlar. Gənclər də yaşlı, peşəkar aktyorların bir böyük, ağsaqqal kimi qeydinə qalmalıdırlar. Onlardan çox şey öyrənməlidirlər. Teatr sahəsində, incəsənətdə yaş məhdudiyyəti olmamalıdır”.
Bunu Moderator.az-a açıqlamasında Füzuli Dövlət Dram Teatrının direktoru, Əməkdar Mədəniyyət İşçisi Vaqif Vəliyev deyib.
O daha sonra əlavə edib:
“İllərin təcrübəsi və titulu imkan verir ki, mən bu sözləri deyim ki, burada çox zaman şəxsi münasibətlər qabardılır. Bəlkə də teatr direktorunun hansısa bir aktyorla münasibəti yoxdursa və s. buna görə də o bu addımı atıb, həmin aktyoru teatrdakı işindən çıxarır. Aktyorun məqsədi, məramı səhnədə olub, rolu oynamaq, tamaşaçıların qarşısına biri-birindən maraqlı obrazlarla çıxmaqdır. Budur, tamaşaçının alqışıdır aktyoru yaşadan. Teatr aktyoru, təbii ki, bir az da yaşlı aktyor teatrdan ayrıldıqdan sonra istər-istəməz həyatı ilə vidalaşır. Fikirləşir ki, mən heç kimə lazım deyiləm. Yaradıcı adamın da fikirləri bir az daha dərin olur. Bu da onun məhvinə gətirib çıxarır. Nə qədər ki, aktyor sözü, obrazı tamaşaçıya çatdıra bilirsə, o qalıb teatrda işəməlidir. Rəhmətlik Ağasadıq Gəraybəylinin neçə yaşı var idi, görün Knyaz rolunu necə gözəl yaradırdı”.
Qeyd edək ki, bir neçə öncə deputatlar və sənətkarlar saytımıza açıqlamasında teatrlarda yaş senzinin ləğv olunmasını tələb etmişdilər.
Geri qayıt