Əsas Səhifə > Güney Press > “Ermənistan Azərbaycanı zərbə endirməyə təhrik edə bilər”
“Ermənistan Azərbaycanı zərbə endirməyə təhrik edə bilər”2-04-2024, 18:15 |
![]() “Dünən Ukrayna mətbuatı məlumat yaymışdır ki, Azərbaycan sərhəd boyu Ermənistanın vizual avadanlığını elektron imkanları sayəsində sıradan çıxarıb. Ancaq sonradan bu məlumat təsdiqini tapmadı. Ermənistan baş naziri Nikol Paşinyan isə bir müddət əvvəl elan etdi ki, Qazax rayonunun anklav kəndləri Azərbaycana məxsusdur və qaytarılmalıdır, əks təqdirdə müharibə başlaya bilər. Nikol Paşinyan bir tərəfdən camaatı qorxudur, digər tərəfdən isə ordusunu sərhəd boyu cəmləşdirir. Bununla əhalini həm sakitləşdirir, həm də “mən nəsə edirəm”,- görüntüsünü yaradır”. Bunu Reyting.az-a hərbi ekspert Azad İsazadə deyib. Azad İsazadə qeyd edib ki, indiki halda Ermənistan ordusunun uğur qazanması mümkünsüz olsa da, təxribat törədə bilərlər: “Erməni tərəfi təxribat törədə, Azərbaycanı zərbə vurmağa təhrik edə və sonrada dünyaya car çəkə bilər ki, Azərbaycan Ermənistana hücum edib. Məncə, erməni siyasətindən bunu gözləmək olar. Odur ki, erməni təxribatlarını istisna etmirəm. Artıq Azərbaycan Müdafiə Nazirliyi də Ermənistan ordusunun sərhədə cəmləşdirildiyini təsdiq edib”. A. İsazadə əlavə edib ki, indiki halda Ermənistan ilə Azərbaycan arasında hansısa mümkün qarşıdurmada maraqlı üçüncü qüvvələr də ola və vəziyyəti gərginləşdirmək üçün əllərindən gələni edə bilərlər: “Bu gün məlum oldu ki, Naxçıvan istiqamətində bizim mövqelərimizə atəş açılıb. Hesab edirəm ki, bu da təxribatdır. Hələlik Azərbaycan tərəfi hadisələrə səbr və təmkinlə yanaşır. Məncə, qəti zərbə vurmaq barədə qərar qəbul edilməyib. Gərginlik və təxribat davam edərsə, Azərbaycan ölçü götürmək üçün tədbirlər görəcək”. Geri qayıt |